Յեյլի համալսարանի ամերիկացի գիտնականները հայտնաբերել են մողեսների տեսակ, որոնք գոյատեւել են 66 միլիոն տարի առաջ՝ դինոզավրերի ոչնչացման պատճառ դարձած երկնաքարի ընկնելուց հետո: Հետազոտությունների համաձայն, այս մողեսները փրկվել են հարվածի էպիկենտրոնի մոտ և մինչ օրս շարունակում են ապրել Հյուսիսային ու Կենտրոնական Ամերիկայի նույն տարածքներում:

Biology Letters (BioLetts) գիտական ամսագրում հրապարակված ուսումնասիրության մեջ նշվում է, որ խոսքը վերաբերում է Xantusiidae ընտանիքի փոքր գիշերային մողեսներին: Գիտնականներն օգտագործել են մոլեկուլյար ժամացույցի մեթոդը, որը բացահայտել է, որ ներկայիս գիշերային մողեսների վերջին ընդհանուր նախնին հայտնվել է մոտ 90 միլիոն տարի առաջ:

Ապացուցվել է, որ այս կենդանիների երկու էվոլյուցիոն ճյուղեր հաղթահարել են Յուկատան թերակղզու վրա ուժգին հարվածի հետեւանքները: Ներկայումս այդ հին աղետի մասին հիշեցնում է 180 կիլոմետր տրամագծով Չիկշուլուբ խառնարանը:

Մասնագետները ճշգրիտ չգիտեն, թե ինչպես են այս սողունները գոյատեւել: Կան միայն վարկածներ, որոնցից մեկն այն է, որ նրանք պարտադված են եղել դանդաղ նյութափոխանակության: Կարեւոր դեր է խաղացել նաեւ այս մողեսների թաքնված ապրելակերպը: Նրանք ունեն փոքր չափսեր (ոչ ավելի, քան 10 սմ), ինչը թույլ է տվել նրանց թաքնվել ժայռերի ճեղքերում կամ ծառերի կեղևի տակ:

Այս գիշերային մողեսները միակ ցամաքային ողնաշարավորներն են, որոնք մինչ այժմ պահպանվել են այդ տարածաշրջանում աղետից ի վեր: Չնայած որոշ այլ տեսակներ նույնպես գոյատեւել են աղետի պահին, սակայն դրանք հետագայում կամ գաղթել են, կամ էլ ոչնչացել: