Ֆրանսիայի Արտաքին անվտանգության գլխավոր վարչության (DGSE) ղեկավար Նիկոլա Լերները հայտարարել է, որ Իրանի միջուկային ծրագրի զարգացումը զգալիորեն դանդաղել է ԱՄՆ-ի և Իսրայելի հարվածներից հետո։ Սակայն բարձր հարստացված ուրանի զգալի մասի գտնվելու վայրը դեռևս անհայտ է։

«Իրանի միջուկային ծրագիրը միայն նյութի հարց չէ։ Այն ներառում է բարձր հարստացված ուրան, դրա վերամշակումը, միջուկային միջուկի արտադրությունը և մարտական լիցքի առաքման համակարգը», — նշել է Լերները՝ Ֆրանսիայի LCI հեռուստաալիքին տված հարցազրույցում։

Ֆրանսիայի հետախուզության ղեկավարը նշել է, որ յուրաքանչյուր փուլ «ծանր վնաս է կրել» վերջին հարձակումների հետևանքով, իսկ ծրագրի իրականացումը «հետաձգվել է առնվազն մի քանի ամսով»։

Նրա խոսքով՝ հարվածների արդյունքում ոչնչացվել է բարձր հարստացված ուրանի միայն փոքր մասը, իսկ մնացածը մնում է Իրանի իշխանությունների վերահսկողության տակ։

«Մենք ունենք տվյալներ, թե որտեղ կարող է գտնվել ուրանը, բայց վերջնական վստահությամբ կարող ենք հայտարարել միայն այն ժամանակ, երբ Միջազգային ատոմային էներգիայի գործակալությունը (ԱԷՄԳ) վերսկսի աշխատանքը տարածաշրջանում։ Առանց դրա՝ մենք չունենք հետևելու միջոցներ», — ընդգծել է Լերները։

Ավելի վաղ հետախուզական գնահատականներում նշվել էր, որ Իրանը կարող էր թաքցնել ուրանի պաշարների մի մասը և պահպանել դրանք վերականգնելու տեխնիկական հնարավորությունները։

«Դրանով է բացատրվում, թե ինչու Ֆրանսիան միջուկային ճգնաժամի դիվանագիտական լուծում փնտրելուն այդքան կարևորություն է տալիս», — ավելացրել է DGSE-ի ղեկավարը։ Նա նաև նշել է, որ Իրանը կարող է շարունակել ծրագիրը գաղտնի կերպով, բայց սահմանափակ հնարավորություններով։