Պետական եկամուտների կոմիտեի նախկին նախագահ Դավիթ Անանյանը հայտարարում է, որ Հայ Առաքելական Եկեղեցու դեմ իրականացվող արշավը, որն ըստ նրա կազմակերպվում է ներկայիս իշխանությունների կողմից, չունի միայն կրոնական ենթատեքստ, այլ ներկայացնում է խորքային գոյաբանական սպառնալիք Հայաստանի ազգային ինքնության ու պետականության համար։

Ֆեյսբուքի իր էջում Անանյանը նշել է, որ այս արշավը ունի քաղաքական ուղղվածություն և ռազմավարական բնույթ։ Ըստ նրա, այն կառուցված է երկու փոխկապակցված փուլերի շուրջ՝ «նվազագույն ծրագիր» և «առավելագույն ծրագիր»։

Նվազագույն ծրագիրը, ըստ Անանյանի, նպատակ ունի թուլացնել Հայ Առաքելական Եկեղեցու բացառիկ սահմանադրական կարգավիճակը։ «Սա իրականացվում է մանիպուլյատիվ դիսկուրսի միջոցով՝ ժողովրդավարության և իրավունքի գերակայության քողի ներքո, նպատակ ունենալով սահմանադրական բարեփոխումների անվան տակ նվազեցնել Եկեղեցու դերը ազգային կյանքում»,- գրել է նա։

Առավելագույն ծրագիրը, ըստ Անանյանի, ուղղված է Հայ Առաքելական Եկեղեցու՝ որպես ազգային ինստիտուտի լիակատար փլուզմանը։ Նա զգուշացնում է, որ սա կարող է հանգեցնել ազգային ինստիտուցիոնալ անկախության կորստի, ինքնության խաթարման և նույնիսկ պետականության վտանգման։

Անանյանը ընդգծել է, որ այս գործընթացը կարող է օգտագործվել որպես քաղաքական գործիք՝ հասարակական գիտակցությունը վերահսկելու, որոշակի խմբեր մոբիլիզացնելու և իշխանության վերարտադրությունն ապահովելու համար։

Նա մտահոգություն է հայտնել նաև ընդդիմադիր և ազգային արժեքներ կրող քաղաքական ուժերի պասիվության վերաբերյալ։ Նրա համոզմամբ, այժմ վճռորոշ պահ է՝ այդ ուժերը պետք է համախմբվեն, մոբիլիզացնեն իրենց ռեսուրսները և գործեն համակարգված՝ կանգնեցնելու եկեղեցու և ազգային ինքնության դեմ ուղղված վտանգավոր գործընթացները։

«Այս պայքարը միայն հավատքի կամ եկեղեցու հարց չէ։ Դա գոյաբանական պայքար է՝ ազգային արժանապատվության, ինքնության, մշակութային շարունակականության և միջազգային սուբյեկտայնության պահպանման համար»,- եզրափակել է Դավիթ Անանյանը։