Հայ Առաքելական Սուրբ Եկեղեցու դեմ իրականացվող արշավը ոչ թե կդադարի եկեղեցու «կառուցողական» քայլերից, այլ՝ կմեծանա։ Այս մասին ֆեյսբուքյան գրառմամբ հայտարարել է Գերագույն հոգևոր խորհրդի անդամ, իրավագիտության դոկտոր Գևորգ Դանիելյանը։

Նրա խոսքով, անկախ սադրիչ երևացող հանգուցալուծումների համակիրների առկայությունից, եկեղեցու ցանկացած քայլ, եթե նույնիսկ ազնիվ մղումներից է բխում, կարող է օգտագործվել ընդդեմ ինստիտուտի։

«Սա պետականության առանցքային հիմնասյուններից մեկի կազմաքանդման օրակարգ է, որը ոչ մի կապ չունի երկրի առջև ծառացած իրական մարտահրավերների հետ։ Ցավոք, գայթակղվել են ոչ միայն մեր հայրենակիցները, այլ նաև ադրբեջանական հանրությունը», — գրել է Դանիելյանը։

Նա ընդգծել է, որ Եկեղեցին՝ իր հավատավոր զավակների աջակցությամբ, կհաղթահարի ստեղծված իրավիճակը և կշարունակի իր ազգապահպան առաքելությունը։

«Շնորհակալություն բոլոր քաղաքական ուժերին և անհատներին, որոնք դրսևորում են արժանապատիվ քաղաքացիական կեցվածք և ողջախոհություն»։

Գևորգ Դանիելյանը գրառումը եզրափակել է մաղթանքով․

«Աստված պահապան Հայ Եկեղեցուն և մեր պետականությանը»։