Հայաստանի Հանրապետության սննդամթերքի անվտանգության տեսչական մարմնի տեսուչները ստուգում են անցկացրել «Հին Ապարան» ՍՊԸ-ի կաթնամթերքի արտադրամասում՝ Կոտայքի մարզի Նաիրի համայնքում։ Ստուգման ընթացքում վերցվել են ապրանքների նմուշներ և ուղարկվել լաբորատորիա՝ հետազոտության։

Սննդամթերքի անվտանգության տեսչական մարմնի տվյալներով՝ լաբորատոր հետազոտության արդյունքում բացահայտվել են խախտումներ։ Մասնավորապես, «Թթվասեր 20%» և «Կաթնաշոռ 18%» արտադրանքի նմուշներում հայտնաբերվել են աղիքային ցուպիկի խմբի մանրէներ (ԱՑԽՄ)։ Բացի այդ, կաթնային յուղի ճարպաթթուների հարաբերակցությունը, այդ թվում՝ պալմիտինաթթու (C16:0), լաուրինաթթու (C12:0), ստեարինաթթու (C18:0), օլեինաթթու (C18:1), լինոլաթթու (C18:2) և այլն, չի համապատասխանել ստանդարտներին։ Նույն խախտումներն արձանագրվել են նաև «Աղաջրային կաթ պարունակող մթերք կաթնայուղի փոխարինիչով «Չանախ»» արտադրանքում։

Ավելի վաղ նույն արտադրամասում «Կարագ 82,5%» արտադրանքի նմուշը կասեցվել էր մեզոֆիլ աէրոբ և ֆակուլտատիվ անաէրոբ մանրէների (ՄԱՖԱնՄՔ) բարձր պարունակության պատճառով։ Սակայն կրկնակի ստուգումից պարզվել է, որ խախտումները չեն վերացվել։

Որպես հետևանք՝ արտադրամասի որոշ գործառույթներ կասեցվել են, իսկ ընկերությանը ժամկետ է տրվել խախտումները վերացնելու համար։ Անվտանգ չհամարվող արտադրանքի խմբաքանակի վաճառքը արգելվել է և տրվել է հրահանգ դրանք շուկայից հետ կանչելու կամ ոչնչացնելու վերաբերյալ։