Թուրքիայի նախագահ Ռեջեփ Թայիփ Էրդողանը հեռախոսազրույց է ունեցել Արաբական Միացյալ Էմիրությունների (ԱՄԷ) նախագահ շեյխ Մուհամմեդ բին Զայեդ Ալ Նահայանի հետ։ Զրույցի ժամանակ Էրդողանը նշել է, որ Թուրքիան ուշադիր հետևում է Աբու Դաբիում ընթացող հայ-ադրբեջանական խաղաղ բանակցություններին։

Ըստ նրա, Անկարան «կշարունակի աջակցել Հարավային Կովկասում կայունության ապահովմանն ուղղված ջանքերին»։

Թուրքիայի նախագահը նաև նշել է, որ երկրի և ԱՄԷ-ի միջև ռազմավարական համագործակցությունը դրական արդյունքներ է տալիս։ Նա հատկապես ընդգծել է պաշտպանական արդյունաբերության ու տեխնոլոգիաների բնագավառում համագործակցության հեռանկարները։

Հիշեցնենք, որ հուլիսի 10-ին Աբու Դաբիում տեղի է ունեցել Հայաստանի վարչապետ Նիկոլ Փաշինյանի և Ադրբեջանի նախագահ Իլհամ Ալիևի հանդիպումը։

Հայաստանի ԱԳՆ-ի տվյալներով՝ կողմերը քննարկել են հայ-ադրբեջանական հարաբերությունների կարգավորման տարբեր հարցեր։ Հաստատվել է, որ անմիջական բանակցությունները հակամարտության կարգավորման ամենաարդյունավետ ձևն են, և որոշվել է շարունակել երկխոսությունը։

Հայտարարության մեջ նշվում է նաև, որ ղեկավարները դրական են գնահատել սահմանազատման գործընթացում ձեռք բերված առաջընթացը և հանձնարարել են շարունակել աշխատանքները։ Կողմերը պայմանավորվել են նաև երկկողմ բանակցություններն ու վստահության ամրապնդման միջոցառումները շարունակել։