Եվրոպական միության կոմիսիայի նախագահ Ուրսուլա ֆոն դեր Լայենը հայտարարել է, որ ԵՄ-ն կերկարաձգի ԱՄՆ-ի նկատմամբ սակագնային պատժամիջոցների կիրառման դադարեցումը մինչև օգոստոսի սկիզբ: Սա կապված է Միացյալ Նահանգների հետ առևտրային համաձայնության հնարավորության հետ:

Այս հայտարարությունից մեկ օր առաջ ԱՄՆ նախագահ Դոնալդ Թրամփը սպառնացել է օգոստոսի 1-ից ԵՄ-ից ներմուծվող ապրանքների վրա 30% լրացուցիչ մաքսատուրքեր սահմանել՝ չնայած երկու կողմերի միջև երկարատև բանակցություններին:

Ֆոն դեր Լայենը շեշտել է, որ Եվրամիությունը կշարունակի պատժամիջոցների նախապատրաստումը՝ հնարավոր վատագույն սցենարի դեպքում: «Մենք ձգտում ենք լուծման հասնել, բայց նաև լիովին պատրաստ ենք իրավիճակի սրացմանը», ասել է նա:

Հիշատակելով, որ ապրիլին ԵՄ-ն ժամանակավորապես կասեցրել էր ԱՄՆ պողպատի և ալյումինի նկատմամբ պատժամիջոցները՝ 21 միլիարդ եվրո արժողությամբ ամերիկյան ապրանքների վրա, ֆոն դեր Լայենը նշել է, որ այդ ժամկետը պետք է ավարտվեր հուլիսի 1-ին: Այժմ այն կերկարաձգվի ևս մեկ ամսով՝ մինչև օգոստոսի 1:

Զուգահեռաբար, ԵՄ-ն արդեն նախապատրաստում է պատժամիջոցների երկրորդ փաթեթը՝ ուղղված 72 միլիարդ եվրո արժողությամբ ամերիկյան ապրանքների դեմ: Այնուամենայնիվ, Ֆոն դեր Լայենը պարզաբանել է, որ դա դեռ պահանջում է անդամ երկրների հավանություն:

Նա նաև հերքել է, որ ԵՄ-ն քննարկել է «հարկադրանքի դեմ պայքարի մեխանիզմի» ակտիվացումը: «Այս գործիքը նախատեսված է արտակարգ իրավիճակների համար, և մենք դեռ պատրաստ չենք դրա կիրառմանը»:

Հարկ է նշել, որ այդ մեխանիզմը թույլ է տալիս ԵՄ-ին պատասխանել այն երկրներին, որոնք փորձում են տնտեսական ճնշում գործադրել անդամ երկրների վրա: Պատժամիջոցները կարող են ընդգրկել ապրանքափոխանակության սահմանափակում, արտաքին ներդրումների կանոնակարգում և այլ տնտեսական ազդեցության մեթոդներ: