Ուրբաթ օրը ԱՄՆ Կալիֆոռնիա նահանգում ֆերմեր է մահացել՝ ԱՄՆ ներգաղթային գործակալների կողմից կանեփի գործարանում կատարված խուզարկության և հարյուրավոր աշխատողների ձերբակալության հետևանքով ստացած վնասվածքներից։ Տեղեկությունը հաստատել է գյուղատնտեսական աշխատողների իրավունքների պաշտպանության խումբը։

ԱՄՆ Ներքին անվտանգության նախարարությունը հայտարարել է, որ մոտ 200 անօրինական ներգաղթյալներ ձերբակալվել են կանեփի արտադրության երկու ֆերմաներում իրականացված արշավի ընթացքում։ Պաշտոնական հաղորդագրության համաձայն՝ գործակալները ֆերմաներում հայտնաբերել են նաև 10 անչափահաս միգրանտի։

Ձեռնարկությունում հետաքննություն է իրականացվում՝ կապված երեխաների աշխատանքի օգտագործման կանոնների խախտումների հետ։ Այս մասին X սոցիալական ցանցում գրել է Մաքսային և սահմանային պահպանության ծառայությունների հանձնակատար Ռոդնի Սքոթը։

Մի քանի գյուղատնտեսական աշխատողներ վիրավորվել են, իսկ մեկը մահացել է։ Մահվան դեպքը տեղի է ունեցել 9 մետր բարձրություն ունեցող շինությունից ընկնելու հետևանքով։ Այս մասին հայտնել է Միացյալ գյուղատնտեսական աշխատողների ազգային փոխնախագահ Էլիզաբեթ Ստրատերը։

ԱՄՆ Ներքին անվտանգության նախարարությունը մեկնաբանել է, որ իրենց աշխատակիցները պատասխանատվություն չեն կրում տղամարդու մահվան համար։ Նրանց պնդմամբ՝ թեև իրավապահ մարմինները նրան չեն հետապնդել, սակայն անձը ինքնուրույն բարձրացել է շինության տանիք և ընկել 30 ֆուտ (մոտ 9 մետր) բարձրությունից։ Գերատեսչությունից նշել են, որ գործակալները անմիջապես բժշկական օգնություն են կազմակերպել։