Հայիթիի 90-ամյա պատմություն ունեցող «Օլոֆսոն» հյուրանոցը, որը նախկինում ընդունել է աշխարհահռչակ աստղերին, այդ թվում՝ Միք Ջագերին և Մարլոն Բրանդոյին, հանգստյան օրերին ամբողջությամբ հրդեհվել է։ Դա տեղի է ունեցել այն ժամանակ, երբ զինված խմբեր գրավել են մայրաքաղաքը։ Այս մասին տեղեկացնում է Bloomberg-ը։

Պորտ-օ-Պրենսի կենտրոնում գտնվող «Օլոֆսոն» հյուրանոցը, որը կառուցված էր «թխվածքաբլիթային» ճարտարապետական ոճով, լրիվ այրվել է։ Այս մասին X-ում (նախկինում՝ Twitter) գրել է Ռիչարդ Մորսը՝ RAM խմբի երաժիշտը, որը նախկինում հաճախ էր ելույթ ունենում հյուրանոցում։

«Այս ոչնչացման հետ մեկտեղ անհետանում է մի ամբողջ մշակութային ժառանգություն, մարում է Հայիթիի քաղաքային և մտավոր կյանքի խորհրդանիշը», — նշել է տեղական «Գազետ Հայիթի» թերթը։

1930-ականներին սովորական առանձնատնից հյուրանոցի վերածված այս շենքը դարձել էր Հայիթիի զարգացման կարճ, բայց պայծառ շրջանի խորհրդանիշը։ 1970-ական և 1980-ականներին այն համարվում էր զբոսաշրջային գլխավոր վայրերից մեկը։ Այստեղ հաճախել են աշխարհահռչակ անձինք, այդ թվում՝ Rolling Stones-ի վոկալիստ Միք Ջագերը և ԱՄՆ նախկին նախագահ Ջոն Ֆ. Քենեդիի այրին՝ Ժակլին Քենեդի Օնասիսը։

«Օլոֆսոնը» նաև ոգեշնչել է բրիտանացի գրող Գրեհեմ Գրինին՝ գրելու իր «Կատակերգուները» վեպը, որը լույս է տեսել 1966 թվականին։

Մարտից ի վեր հյուրանոցի շրջակայքը անմատչելի է եղել բնակիչների համար, քանի որ տարածքը գրավել են զինված խմբեր, որոնք պարբերաբար բախվել են ոստիկանության հետ։

ՄԱԿ-ի տվյալներով՝ խմբավորումները այժմ վերահսկում են Պորտ-օ-Պրենսի 90%-ը, իսկ տարվա սկզբից սպանվել է ավելի քան 4000 մարդ։