Իշխանության բացահայտ հակահայ գործողությունների ալիքում հերթական ահազանգը հնչեց «Էջմիածին» դաշինքից, որն անզիջում տոնով նախազգուշացնում է՝ վտանգված է Հայ Առաքելական Եկեղեցու սրբազան սիրտը՝ Մայր Աթոռ Սուրբ Էջմիածինը։

Հայտարարությունը միանշանակորեն մատնանշում է՝ տեղի ունեցող քարոզչական արշավը Եկեղեցու դեմ իրականացվում է ոչ թե զուտ ներքաղաքական, այլ լայնածավալ ազգային և հոգևոր մակարդակում՝ ինչպես ներքին, այնպես էլ արտաքին թշնամական ուժերի ուղղորդմամբ։ Դաշինքը կանխորոշում է իշխանության հաջորդ թիրախը՝ հայ ժողովրդի հավաքական ոգին, պայքարի կամքը և հոգևոր արժանապատվությունը։

«Սա պայքար չէ մի քանի հոգևորականի դեմ։ Սա բացահայտ պատերազմ է մեր հոգևոր ինքնության, Հայ Առաքելական Եկեղեցու, ու հայության հոգևոր ամրության դեմ», — ասված է հայտարարության մեջ։

Աղմկահարույց հայտարարությունն ուղիղ տոնով խոսում է օկուպացիայի վտանգի մասին՝ վստահեցնելով, որ Փաշինյանի ռեժիմը ձգտում է ձեռք դնել ոչ միայն պետական, այլև եկեղեցական ինստիտուտների վրա։

Դաշինքը կոչ է անում հոգևոր մայրաքաղաք Էջմիածնի բնակիչներին, ինչպես նաև ողջ հավատավոր հայ ժողովրդին, համախմբվել սրբության պաշտպանության համար, պատրաստ լինել գործնական քայլերի՝ կանխելու «Մայր Աթոռի զավթումը»։

«Սա վերքաղաքական և վերկուսակցական պայքար է։ Պետք է մի կողմ դրվեն խմբային ու անձնական շահերը։ Մենք, էջմիածնեցիներս, ստանձնում ենք այդ պատասխանատվությունը», — հնչում է վճռական ուղերձը։

Հայտարարությունն ավարտվում է բարձրագոչ և միաժամանակ զգուշացնող կոչով․

«Ոտքի՛, Էջմիածի՛ն, վտանգված է Մայր Աթոռը։ Քրիստոսի Եկեղեցին պաշտպանված է լինելու ոչ միայն Աստծո, այլև հավատացյալ ժողովրդի կամքով»։