Կալանքի տակ գտնվող գործարար Սամվել Կարապետյանը Երևան քաղաքի առաջին ատյանի դատարան ներկայացրել է հայցեր՝ «Քաղաքացիական պայմանագիր» խմբակցության պատգամավորներ Հայկ Կոնջորյանի և Արսեն Թորոսյանի դեմ: Գործարարը պահանջում է հերքել զրպարտչական և վիրավորական բնույթի հայտարարությունները, ինչպես նաև յուրաքանչյուրից ստանալ 9 մլն դրամ փոխհատուցում:

Արսեն Թորոսյանը ԱԺ նստաշրջաններից մեկի ժամանակ նշել էր. «Ես 2 հայտարարության եմ ուզում անդրադառնալ, որոնց հեղինակների պորտը ոնց որ թե Լուբլյանկայում են կտրել, ՖՍԲ-ի շտաբ կվարտիրայում: Առաջինի անունը Արշակա… Հիմա մյուս հերոսին անդրադառնամ, նույն ինքը Սամվել Կարապետյանին»: Կարապետյանն այս արտահայտությունները գնահատել է որպես վիրավորանք և պահանջում է հրապարակային ներողություն, ինչպես նաև 6 մլն դրամ փոխհատուցում:

Զրպարտության մասով Կարապետյանը պահանջում է հերքել այն պնդումը, թե իբր Ռուսաստանի Դաշնության Անվտանգության դաշնային ծառայության (ՖՍԲ) կողմից նրան հանձնարարվել է Հայաստանի օրինական իշխանության դեմ բռնություն գործադրել:

Հայկ Կոնջորյանի դեմ հայցը կապված է ԱԺ-ում նրա կողմից արված մի շարք արտահայտությունների հետ, որոնք Կարապետյանը բնութագրել է որպես վիրավորական: Դրանց թվում են «օլիգարխիական թև», «ծառայամիտ հացկատակ պնակալեզներ», ինչպես նաև այն պնդումը, որ Կարապետյանը «տասնամյակներով թալանել է հայ ժողովրդին»: Գործարարը պահանջում է հրապարակային հերքում և 3 մլն դրամ փոխհատուցում:

Երկու դեպքերում էլ Կարապետյանը պահանջում է, որպեսզի պատգամավորները սոցիալական ցանցերում կամ հայտարարությունների միջոցով հրապարակայնորև ներողություն խնդրեն: Եթե դա հնարավոր չլինի, հայցատուն պահանջում է, որ նրանք հերքումը հրապարակեն առնվազն 5000 տպաքանակ ունեցող մեկ տպագիր լրատվամիջոցում:

Հիշեցնենք, որ 2025թ. հունիսին Սամվել Կարապետյանը հարցազրույց է տվել՝ մեկնաբանելով եկեղեցու ու իշխանության հարաբերությունները: Դրան հաջորդել են մի շարք իրադարձություններ, այդ թվում՝ Կարապետյանի առանձնատանը խուզարկություն և ձերբակալություն: Նրան մեղադրանք է առաջադրվել սահմանադրական կարգը բռնի տապալելուն ուղղված կոչեր հնարելու մասով:

Ներկայումս Սամվել Կարապետյանը պահվում է կալանքի տակ: Նա Ռուսաստանում և Հայաստանում գործող «Տաշիր» բիզնես խմբի հիմնադիրն է, որի կազմում ընդգրկված են 200-ից ավելի ընկերություններ՝ տարբեր ոլորտներում: