**Սամվել Կարապետյանն Արսեն Թորոսյանին ու Հայկ Կոնջորյանին դատի է տալիս. պատգամավորի արձագանքը**

«Քաղաքացիական պայմանագիր» խմբակցության պատգամավոր Արսեն Թորոսյանը մեկնաբանել է գործարար Սամվել Կարապետյանի կողմից իր և ընկերոջ՝ Հայկ Կոնջորյանի դեմ ներկայացված հայցերը:

«Ինչպիսի՜ մեծ պատիվ: Գիտեն՝ փող ունեն, կարող են տասնյակ փաստաբաններ վարձել ու բոլորին դատի տալ, որ հարցեր լուծեն, օրինակ՝ մեզ լռեցնե՞լ: Լու՞րջ»,— գրել է Թորոսյանն իր Facebook-ի էջում:

Նախկինում հաղորդվել էր, որ Սամվել Կարապետյանն Երևանի առաջին ատյանի դատարան ներկայացրել է հայցեր՝ պահանջելով Հայկ Կոնջորյանից ու Արսեն Թորոսյանից յուրաքանչյուրից 9 մլն դրամ փոխհատուցում: Նրա խոսքով, պատգամավորները տարածել են զրպարտչական ու վիրավորական դրույթներ:

Արսեն Թորոսյանի դեմ հայցը կապված է ԱԺ-ում 2025 թ. արված մեկնաբանության հետ, որտեղ նշվել էր. «…Ասողների պորտը կարծես Լուբլյանկայում են կտրել, ՖՍԲ-ի շտաբում: …Մյուս հերոսը Սամվել Կարապետյանն է»: Կարապետյանը պահանջում է ներողություն և հրապարակային հերքում:

Իր հերթին, Հայկ Կոնջորյանի մասին հայցում նշված է, որ պատգամավորն ԱԺ-ում ելույթում Կարապետյանին անվանել է «տրոյական վեղարի սկզբունքով» գործող, որը «դարերով թալանել է հայ ժողովրդին ու Հայաստանը»՝ էժան գնով գույք ստանալով ու դրա դիմաց «թուլափայ» բարերարություն կատարելով:

Կարապետյանն ուզում է, որ երկու պատգամավորներն էլ հրապարակավ ներողություն խնդրեն, Facebook-ում հերքում հրապարակեն, իսկ դա չլինելու դեպքում՝ 5 օրվա ընթացքում հերքում տպագրեն առնվազն 5000 տպաքանակով թերթում: