Հուլիսի 2-ին Մայր Տաճարում հայրենիքի խաղաղության, գերիների ազատության և տառապողների մխիթարության համար Սուրբ Պատարագ է մատուցվել։ Պատարագին նախագահել է Մայր Աթոռ Սուրբ Էջմիածնի Վարչատնտեսական բաժնի տնօրեն Գերաշնորհ Տեր Մուշեղ եպիսկոպոս Բաբայանը։ Մայր Աթոռի տեղեկատվական համակարգը հաղորդում է այդ մասին։

Քարոզի ընթացքում Սրբազան Հայրը ընդգծել է, որ Քրիստոսի և առաքյալների գործունեությունը զրկանքներով է լցված՝ հիշեցնելով Տիրոջ խոսքերը. «Եթե Ինձ հալածեցին, ձեզ էլ կհալածեն» (Հովհ. 15:20)։ Սա որպես զգուշացում է բոլոր ժամանակներում հավատացյալներին սպասվող դժվարությունների մասին։

«Մեր օրերն այսօր էլ հիշեցնում են Տիրոջ երկրային կյանքի և առաքյալների գործունեության ժամանակները, քանի որ այսօր էլ Եկեղեցու դեմ ծավալվում են դատապարտելի արշավներ, իսկ Փրկչի կենարար ուսմունքի դեմ առաջադրվում են կեղծ գաղափարախոսություններ։ Ինչպես ժամանակին Հավիտենական և Խաղաղության Թագավորի փոխարեն հրեից թագավոր էին փնտրում, իսկ մարդկանց հոգիների Փրկչի փոխարեն՝ հռոմեացիների լծից ապստամբ ազատարար, այնպես էլ այսօր արդարության կոչողների մեջ համախոհներ են փնտրում, իսկ խաղաղության քարոզիչներին՝ ըմբոստներ», — ասել է Սրբազան Հայրը։ Նա նշել է, որ Հայրենիքի խաղաղության և ժողովրդի բարօրության համար աղոթող եկեղեցականներն այսօր թիրախավորվում են։

«Մեր հոգևոր եղբայրներ՝ իրենց կյանքը Աստծուն, եկեղեցուն և հայրենիքին նվիրած Միքայել և Բագրատ արքեպիսկոպոսները, ինչպես նաև եկեղեցու պաշտպանության համար կանգնած ու հավատքն իր գործերով ապրող ազգային բարերար Սամվել Կարապետյանը այսօր անօրինաբար կալանավորված են և մեկուսարաններում են», — հայտարարել է պատարագիչ Սրբազանը։ Նա կոչ է արել հավատացյալներին աղոթել Աստծուն, որպեսզի փարատվի նրանց միայնությունը։

Վերջում Տեր Մուշեղ եպիսկոպոսը կոչ է արել հավատացյալներին մնալ հավատարիմ հոգևոր ու ազգային արժեքներին, սիրել ճշմարտությունը, պայքարել դրա համար և չվախենալ հալածանքներից։