Տարածքային կառավարման և ենթակառուցվածքների նախարար Դավիթ Խուդաթյանը հունիսի 9-ին Ազգային ժողովում լրագրողների հետ զրույցում հայտարարել է, որ իշխանությունները Հայ Առաքելական Եկեղեցու (ՀԱԵ) դեմ արշավ չեն իրականացնում։

Խուդաթյանը, արձագանքելով հանրային կարծիքի հարցումներին, ըստ որոնց՝ ՀԱԵ-ի վարկանիշը 71% է, իսկ իշխանության՝ 17%, նշել է, որ տեղյակ չէ նման հարցումներից, սակայն շեշտել է.
«Մինչև եկեղեցին չհայտարարի, որ պատրաստ է մասնակցել 2026 թվականի ընտրություններին որպես կուսակցություն, այն չի համարվի մեր քաղաքական հակառակորդը»։

Նրա խոսքով՝ վերջին շրջանում ՀԱԵ-ի որոշ բարձրաստիճան ներկայացուցիչներ ներգրավված են քաղաքական գործընթացներում, ինչը մտահոգիչ է։ Խուդաթյանը նշել է, որ որպես քրիստոնյա և քաղաքացի՝ անհանգստացած է կուսակրոնության երդման հնարավոր խախտումներից։ Նա ընդգծել է, որ այդ հարցի շուրջ «Քաղաքացիական պայմանագիր» խմբակցության ներսում քննարկման չի մասնակցել։

Հիշեցնենք՝ մայիսի 29-ին վարչապետ Նիկոլ Փաշինյանը կառավարության նիստում հայտարարել էր, որ Հայաստանում գործող եկեղեցիները «չուլանացված են»՝ մատնանշելով, որ դրանցում պահվում են աղբ, անձնական իրեր ու նույնիսկ մահճակալներ։ Իսկ օրեր անց նա կասկածի տակ էր դրել Ամենայն հայոց կաթողիկոս Գարեգին II-ի կուսակրոնությունը՝ նշելով, որ եթե հաստատվի, որ նա երեխա ունի, ապա չի կարող մնալ կաթողիկոսի պաշտոնում։

ՀԱԵ-ի պատասխանն չի ուշացել։ Էջմիածնում գումարված Գերագույն Եկեղեցական Խորհրդի նիստից հետո տարածված հայտարարության մեջ Փաշինյանի հռետորաբանությունը որակվել է որպես
«ամոթալի հակաեկեղեցական արշավ», որը, ըստ նրանց, կարող է ունենալ կործանարար հետևանքներ ինչպես պետականության, այնպես էլ հոգևոր կյանքի համար։