Սևանավանքի վանահայր Տեր Մինաս Մարտիրոսյան. «Եկեղեցին բաց է մնում բոլորի համար»

Սևանավանքի վանահայր, Տեր Մինաս ավագ քահանա Մարտիրոսյանը մեկնաբանել է վերջին շրջանում Հայ Առաքելական Եկեղեցու շուրջ ծավալվող իրադարձությունները։ Նա հերքել է, թե եկեղեցու վիճակի վերաբերյալ բանակցությունները նվազեցրել են Սևանավանք այցելուների թիվը։

Տեր Հայր, ինչպե՞ս են հավատացյալներն արձագանքում եկեղեցու և իշխանությունների միջև քննարկվող հարցերին։

Մարդիկ շարունակում են մասնակցել մեր աղոթքներին։ Նույնիսկ, նկատվում է ակտիվություն՝ եկեղեցու նկատմամբ հետաքրքրության աճ։ Որոշները փորձում են հասկանալ իրավիճակը և դիմում են մեզ՝ ցանկանալով իմանալ մեր տեսակետը։ Ես միշտ հիշեցնում եմ, որ եկեղեցու ներսում եղած հարցերը պետք է լուծվեն նույն եկեղեցու ներսում, ոչ թե հրապարակային բանավեճերի թեմա դառնան։

Եկեղեցին այսօր ի՞նչ մեղքեր ունի։ Ունի՞ արդյոք բաժին մեղք ստեղծված իրավիճակում։

Եկեղեցին 2000 տարվա պատմություն ունի՝ սրբերով, հոգևորականներով և հավատացյալներով։ Բնականաբար, թերություններ կան, և դրանցից մեկն այն է, որ շատերը պասիվ են։ Շատերը հազվադեպ են կարդում Աստվածաշունչ կամ աղոթում։ Սա խնդիր է, որը դեռ պետք է շտկել։ Հոգևորականները նույնպես պարտավոր են ճիշտ ուղղությամբ ուսուցանել հավատացյալներին։

2020 թվականին դուք մկրտել եք վարչապետ Նիկոլ Փաշինյանի դստերը՝ Արփիին։ Ի՞նչ եք զգում այսօր՝ տեսնելով վարչապետի՝ եկեղեցու դեմ հանդես գալը։

Մկրտության ժամանակ ես միշտ բացատրում եմ ծնողներին ու կնքահայրերին, որ իրենց պարտավորությունն է երեխային կրոնական ոգով դաստիարակել։ Նույնը ասել եմ վարչապետին։ Սակայն յուրաքանչյուր մարդ իր ներքին ընկալումն ունի։ Հետագայում հաշվետու չենք կարող լինել ամեն մկրտվածի՝ նրա հոգևոր վարքագծի համար։

Վարչապետը կոչ է անում Գարեգին Բ-ին հրաժարվել գահից։ Դուք իրոք հավատացյալ եք համարում նրան, թե՞ առկա է խոսքի և արարքի անհամապատասխանություն։

Քրիստոնյան պետք է եկեղեցու ցավն իրի սեփականը համարի։ Խնդիրները պետք է լուծվեն ներսում, ոչ թե դրսից քննադատվեն։ Օրինակ, երբեք չեմ լուսանկարի իմ տան անկարգությունը՝ այն հրապարակելու համար։ Նույն սկզբունքը վերաբերում է եկեղեցուն։

Վարչապետն ասում է, որ ամուսնացած քահանաներն իր «եղբայրներն» են։ Փորձ կա՞ քահանայական դասը պառակտելու։

Այստեղ հստակ փորձ կա պառակտում ստեղծել։ Եղբայրությունը պահանջում է խոնարհություն, համեստություն և ներողամտություն։ Սակայն այստեղ մենք տեսնում ենք հակառակը՝ ցեխի նետում, անհիմն մեղադրանքներ։ Սա վտանգավոր է և կարող է վնասել ինչպես եկեղեցուն, այնպես էլ պետությանը։

Տավուշի և Շիրակի թեմերի եպիսկոպոսներն այսօր կալանավորված են։ Ինչպե՞ս եք գնահատում այս քայլը։

Պատմության մեջ եկեղեցին հաճախ հալածվել է։ Բագրատ և Միքայել սրբազանները եկեղեցականներ էին, որոնց խոսքը վտանգավոր չէր։ Նրանց խոսքերը երկրի ապագայի մասին մտահոգությունից էին։ Պետք է աջակցել նրանց՝ մնալով խաղաղ ու հավատարիմ քրիստոնյա։

Ի՞նչ ելք տեսնում եք կոնֆլիկտից։ Կարո՞ղ է արդյոք երկխոսությունը լուծում բերել։

Աստված միշտ պատրաստ է ներել։ Քրիստոնյաները պետք է հիշեն, որ պարտավոր են անվերջ ներել։ Եթե ժողովուրդը մի փոքր քայլ անի դեպի Աստված՝ նա կարձագանի մեծ քայլով։ Երկխոսությունը կարող է արդյունք տալ, բայց հարցը մնում է՝ արդյոք կա ապաշխարության զգացում։

Թագուհի Մելքոնյան