Շիրակի մարզում, մասնավորապես՝ Աշոցք համայնքի մի շարք բնակավայրերում, բրուցելոզի վարակը լուրջ չափերի է հասել, ինչի հետևանքով գյուղացիները կորցնում են իրենց ապրուստի միակ աղբյուրը՝ անասունները, առանց որևէ պետական աջակցություն ստանալու։ Այս մասին ահազանգում է ԱԺ «Հայաստան» խմբակցության պատգամավոր Մհեր Մելքոնյանը։

«Այս իրավիճակն այլևս ոչ թե մասնագիտական բացթողում է, այլ իշխանությունների հանցավոր անփութություն», – գրել է պատգամավորը Facebook-ի իր էջում։

Մելքոնյանի խոսքով՝

• Վարակված անասուններ են հայտնաբերվել տարբեր գյուղերում,
• Մարդիկ չեն իրազեկվել վտանգների մասին և շարունակում են շփվել հիվանդ կենդանիների հետ՝ առանց պաշտպանության միջոցների,
• Պետական կառույցները լուռ են․ ոչ վերահսկողություն, ոչ փոխհատուցում, ոչ կանխարգելիչ միջոցառումներ։

Պատգամավորը այցելել է Մուսայելյան բնակավայր, որտեղ, ըստ նրա, իրավիճակը չափազանց լուրջ է․

«Գյուղացիները մնացել են մենակ՝ առանց պետական որևէ լուրջ աջակցության»։

Մհեր Մելքոնյանը պահանջում է հետևյալ քայլերը․

Շտապ արձագանք՝ առողջապահության և սննդանվտանգության կառույցների կողմից,

Համապարփակ ստուգումներ Շիրակի մարզի բոլոր գյուղական բնակավայրերում,

Արդար փոխհատուցում՝ ֆերմերներին հասցված վնասի դիմաց,

Իրազեկման համապետական արշավ՝ բրուցելոզի կանխարգելման համար։