Հնդկաստանի արտաքին գործերի նախարար Սուբրամանյամ Ջայշանկարը երեքշաբթի այն կարծիքն է հայտնել, որ Փահալգամի վրա իրականացված հարձակումը Հնդկաստանի դեմ «տնտեսական պատերազմի» ակտ է:

ԱՄՆ կատարած այցի ժամանակ միջոցառման ելույթում Հնդկաստանի արտգործնախարարն ընդգծել է, որ հարձակումը, որի հետևանքով զոհվել է 26 մարդ, նպատակ է ունեցել խախտել Քաշմիրի տնտեսական կայունությունը:

«Մենք երկար ժամանակ ենք լսում, որ Հնդկաստանն ու Պակիստանը երկուսն էլ միջուկային ուժեր են, և իբր այդ պատճառով, երբ մեկ կողմը սարսափելի գործողություններ է իրականացնում, մյուսը չպետք է պատասխան քայլեր ձեռնարկի՝ հաշվի առնելով համաշխարհային անվտանգության վրա դրանց ազդեցությունը: Այս տրամաբանությունը պետք է մերժվի»:

«Փահալգամի հարձակումը տնտեսական պատերազմի ակտ էր: Այն նպատակաուղղված էր ոչնչացնել Քաշմիրի զբոսաշրջությունը, որը տարածաշրջանի տնտեսության գլխավոր սյուներից է: Բացի այդ, այն փորձ էր կրոնական բռնություն հրահրելու՝ քանի որ զոհերին ստիպել են բացահայտել իրենց դավանանքը նախքան սպանելը: Մենք չենք կարող թողնել, որ ահաբեկիչները մնան անպատիժ: Այն մտայնությունը, թե սահմանից այն կողմ գտնվելը պաշտպանում է պատժից, պետք է հերքվի: Մենք հենց դա արեցինք»,— նշել է Ջայշանկարը՝ հղում անելով Հնդկաստանի կողմից ձեռնարկված «Սինդուր» գործողությանը և ահաբեկչության դեմ պայքարի իրավունքին: