**Հայաստանի գլխավոր դատախազն ընդունել է Ավստրիայի դատախազության բարձրաստիճան ներկայացուցչին**

Հայաստանի գլխավոր դատախազ Աննա Վարդապետյանն այսօր՝ Դիլիջանում գտնվող Դատախազության նստավայրում, հանդիպել է Ավստրիայի Հանրապետության գլխավոր դատախազի տեղակալ Ալեքսանդրա Ռամուշի հետ։

Ալեքսանդրա Ռամուշը Հայաստան է ժամանել մասնակցելու 2025 թ. հուլիսի 1-ին Դիլիջանում կայանալիք միջազգային համաժողովին։ Համաժողովի թեման է՝ «Դատախազների անկախությունն ու անաչառությունը՝ կոռուպցիայի և փողերի լվացման հետ կապված հանցագործությունների քրեական հետապնդման համատեքստում»։ Նրա այցը կապված է նաև Հայաստանի Դատախազության հիմնադրման 107-ամյակի և Դատախազության աշխատողի օրվա հետ։

Գլխավոր դատախազ Աննա Վարդապետյանը նշել է, որ Հայաստանի և Ավստրիայի միջև գործում են քրեական գործերով փոխգործակցությունն ապահովող մի շարք միջազգային փաստաթղթեր, այդ թվում՝ Եվրոպայի Խորհրդի կոնվենցիաները։ Այս գործիքները հնարավորություն են տալիս երկու երկրների միջև կարևոր իրավական հարցերում արդյունավետ համագործակցել։

Վարդապետյանը շնորհակալություն է հայտնել Ավստրիայի իրավասու մարմիններին՝ Հայաստանին ուղղված իրավական օգնության հարցումների մեծ մասը կատարելու համար։ Նա առաջարկել է շարունակել համատեղ աշխատանքը՝ ուղղված Հայաստանից ապօրինի ուղիներով դուրս բերված գումարներով Ավստրիայում ձեռք բերված գույքի արգելափակմանն ու հետագա տնօրինմանը։

Ավստրիայի դատախազության ներկայացուցիչը շնորհակալ է հայտնել հրավերի և ջերմ ընդունելության համար և փոխանցել իր երկրի գլխավոր դատախազի ողջույններն ու բարեմաղթանքները։ Ռամուշը ընդգծել է Հայաստանի հետ համագործակցության խորացման կարևորությունը և Ավստրիայում դատախազների անկախությունն ապահովող մեխանիզմների մասին։

Համաժողովը կայանալու է ԵՄ-ի և Եվրոպայի Խորհրդի «Գործընկերություն հանուն լավ կառավարման» ծրագրի շրջանակներում՝ Հայաստանում դատաիրավական բարեփոխումներին և տնտեսական հանցագործությունների դեմ պայքարին աջակցելու նպատակով։