Երևանի Արզումանյան փողոցի 10-րդ և 17-րդ հասցեներում գտնվող վթարային շենքերի փոխարեն նորերը կառուցելու և տեղի բնակիչներին նոր բնակարաններ տրամադրելու ծրագիրը ներկայումս գտնվում է պայմանագրերի կնքման և դատական գործընթացների փուլում։ Այս մասին հունիսի 30-ին Երևանի քաղաքապետարանի աշխատանքային նիստում տեղեկացրել է Երևան քաղաքի կառուցապատման ներդրումային կենտրոնի (ԾԻԳ) տնօրեն Անետա Բաբայանը։

«Դեռևս 16 գույքի հետ պայմանագրեր չեն կնքվել երկու շենքի համար։ Սպասվում է, որ հուլիսի 3-ին երեք պայմանագիր կստորագրվի, իսկ մնացած դեպքերում գործընթացը դեռևս դատական քննարկման փուլում է։ Բնակիչների կողմից պայմանագրեր չստորագրելու պատճառները տարբեր են. մենք շարունակաբար աշխատում ենք այդ հարցերի շուրջ։ Սակայն բանակցությունների արագությունն ու ինտենսիվությունը հաճախ կախված են բնակիչներից, քանի որ շատ դեպքերում խնդիրը վերաբերում է վստահության հարցին` տարբեր վարչական գործընթացների կամ պետության նկատմամբ»,- նշել է նա։ Բաբայանը հավելել է, որ մեկ տարվա ընթացքում 76 պայմանագրերից արդեն կնքվել է գրեթե 60-ը։

Իր հերթին Երևանի քաղաքապետ Տիգրան Ավինյանը նշել է, որ այդ շենքերում ապրողները նախ՝ պետք է հասկանան, որ իրենց կյանքը վտանգի տակ է. «Երևանի քաղաքապետարանն այս ծրագիրն իրականացնում է հենց այդ պատճառով։ Այստեղ ո՛չ լիազորություն ունի, ո՛չ պարտականություն Երևան քաղաքապետարանը»:

«Ամենակարևորը, որ այս գործընթացը որոշակի ժամկետում ավարտվի։ Բոլոր այն շենքերը, որոնք մաքրվել են բնակիչներից, պետք է ապահովվեն, որպեսզի նոր մարդիկ չհայտնվեն ու պահանջեն նույն արտոնությունները: Այդ շենքերը պետք է հիմնովին քանդվեն, նույնիսկ եթե դրա համար տրակտորով մի քանի անգամ անցնել պետք լինի»,- ասել է նա։

Քաղաքապետին հայտնել են, որ Արցախի փողոցում գտնվող վթարային շենքերն արդեն ամբողջությամբ քանդված են։

Ինչ վերաբերում է Արցախի փողոցի չորրորդ նրբանցքի 10 և 10/1 հասցեներում գտնվող չորրորդ կարգի վթարային շենքերին, տեղեկացվել է, որ 5 բնակարանի բնակիչներ դեռ համաձայնություն չեն տվել տարհանմանը, մնացածները հեռացել են։ Նշվել է, որ բնակիչներից մեկը, որն ունի 40 քմ օրինական և 40 քմ անօրինակ լրացուցիչ տարածք, մերժել է 60 քմ մակերեսով երկսենյականի բնակարանի առաջարկը՝ պահանջելով երեք երկսենյականի բնակարան։

Տիգրան Ավինյանն առաջարկել է ազատված բոլոր բնակարանները քանդել և ստացել հաստատում, որ դա արդեն արված է։