Թուրք գործարար Գալիփ Օզթյուրքը, ով Metro Turizm տրանսպորտային ընկերության հիմնադիրն է և Վրաստանի տնտեսությունում մեծ ներդրումներ կատարած անձ, ազատ է արձակվել վրացական բանտից երեք տարվա ազատազրկումից հետո։

Օզթյուրքին ձերբակալել էին 2022 թվականի մայիսին՝ Բաթումիում նրա տանը և գրասենյակներում խուզարկություններից անմիջապես հետո։ Վրաստանի ֆինանսական ոստիկանությունը նրան մեղադրում էր հարկերից խուսափելու, փողերի լվացման և փաստաթղթեր կեղծելու մեջ։ Սակայն դատարանը նրան մեղավոր ճանաչեց թմրանյութեր պահելու համար, քանի որ նրա տանը հայտնաբերվել էր 7,2 գրամ կոկաին։ 2023 թվականի փետրվարին Օզթյուրքին դատապարտեցին ութ տարվա ազատազրկման, սակայն 2025 թվականի հունիսին նա անսպասելիորեն դուրս եկավ բանտից։

Նրա ազատման վերաբերյալ կան տարբեր վարկածներ։ Taka Gazete պարբերականի տվյալներով՝ Օզթյուրքին բանտից ազատել են պայմանական վաղաժամկետ ազատման կարգով՝ հետագա հսկողության ներքո։ Günaydın Samsun-ը նշում է, որ ազատ արձակումը տեղի է ունեցել փաստաբանների բողոքարկումից և գործի վերանայումից հետո։ Մինչդեռ Batumelebi պարբերականը, հղում անելով պաշտպանությանը, հայտնում է, որ գործարարը մեղքն ընդունել է, ինչը հանգեցրել է ազատման պայմանների մեղմացմանը։

Օզթյուրքի կենսագրությունը լի է հակասություններով։ Թուրքիայում նա բազմիցս հետաքննվել է ֆինանսական հանցագործությունների կապակցությամբ, բայց միշտ խուսափել է պատժից։ 2018 թվականին թուրքական դատարանը նրան ցմահ ազատազրկման էր դատապարտել սպանության կազմակերպման մեջ մեղադրվելու համար, սակայն այդ ժամանակ նա արդեն Վրաստանում էր, որտեղ ստացել էր քաղաքացիություն։

Վրաստանում Օզթյուրքը դարձել է նշանավոր դեմք՝ կապիտալ ներդնելով հյուրանոցների, առևտրի կենտրոնների, տրանսպորտի և շինարարության ոլորտներում։ Նա հաճախ հայտնվել է պաշտոնական միջոցառումներում՝ կառավարության անդամների հետ։ 2020 թվականի տվյալներով՝ նրա ներդրումների ընդհանուր ծավալը երկրում կարող էր հասնել 500 միլիոն դոլարի։ Նրա ամենահայտնի նախագիծը Բաթումիի Euphoria հյուրանոցն է։

Ձերբակալությունից հետո Թուրքիան հայտարարել էր Օզթյուրքի արտահանձնման պահանջը, բայց վերջինս մնաց Վրաստանի իրավասության ներքո։