Փաստաբան Արամ Վարդևանյանը Մայր Աթոռում լրագրողների հետ զրույցում նշեց, որ չի բացառում հնարավորությունն այն բանի, որ կային իրավապահներ, որոնք հրաժարվել են կատարել հրամանները։ Նա հստակեցրեց. «Ես համոզված եմ, որ իրավապահների մեջ էլ կան մարդիկ, ովքեր Հայ Առաքելական եկեղեցու հետևորդներ են և ունեն կարմիր գծեր, որոնք չեն հատի»։

Զրույցի ընթացքում Վարդևանյանը անդրադարձավ Մայր Աթոռում տեղի ունեցած իրադարձություններին, երբ Միքայել Սրբազանին բերման ենթարկելու համար հարյուրավոր ոստիկաններ, ԱԱԾ աշխատակիցներ և հատուկջոկատայիններ էին ժամանել։ Նրանք կիրառել են բռնություն հոգևորականների և քաղաքացիների նկատմամբ։ Փաստաբանը մեկնաբանեց. «Որքանով հաղորդագրություններից եմ հասկացել, խոսքը գնում է ենթադրյալ միջին ծանրության հանցանքի մասին։ Սովորաբար նման դեպքերում նույնիսկ մեկ ոստիկան հազվադեպ է ուղարկվում անձին բերման ենթարկելու։ Այստեղ մենք տեսնում ենք հազարավոր իրավապահներ, որոնք ինտենսիվ հարկադրանքի միջոցներ են կիրառում ենթադրյալ միջին ծանրության հանցանքի կապակցությամբ»։

Վարդևանյանը ընդգծեց, որ խոսքն անգամ խոսքի ազատության մասին է. «Համարենք՝ խոսքի ազատությունը լինում է ցնցող, սուր։ Բայց Եվրոպական դատարանի նախադեպային իրավունքը պարզ է. դա թույլատրելի է։ Եթե պետությունը ընտրում է ժողովրդավարության ճանապարհը, ապա խոսքի ազատությունը պետք է լինի ամենակարևոր արժեքը։ Մինչդեռ եթե ընտրվում է բռնապետության ուղին, ապա խոսքի ազատությունը, նույնիսկ եթե սուր է արտահայտված, հանգեցնում է նրան, ինչին Վեհարանում վկա ենք դարձել՝ հազարավոր իրավապահների գործողություններին»։

Փաստաբանը հիշեցրեց, որ Հայաստանը ձգտում է Եվրոպական Միությանը, սակայն ԵՄ-ում նմանատիպ իրավիճակներ անընդունելի կլինեին։