Ռուսաստանի նախագահ Վլադիմիր Պուտինը հայտարարել է, որ Իսրայելի և Իրանի միջև հակամարտությունը հիմնականում լուծվել է: Ըստ նրա, սա նոր հնարավորություններ է ստեղծում Եվրասիական տնտեսական միության (ԵԱՏՄ) և Մերձավոր Արևելքի երկրների միջև համագործակցության համար:

Պուտինը այս մտքերն արտահայտել է հունիսի 26-ին Մինսկում կայացած Եվրասիական տնտեսական ֆորումի ժամանակ: «Իրանի հետ ազատ առևտրի համաձայնագիրը ուժի մեջ է մտել մայիսին: Հուսով ենք՝ տարածաշրջանում իրավիճակը կկայունանա: Իսրայելի և Իրանի միջև հակամարտությունը փաստացի ավարտվել է», – ասել է Ռուսաստանի նախագահը:

Պուտինը ընդգծել է, որ ստեղծված իրավիճակը հնարավորություն է տալիս ԵԱՏՄ-ին ամրապնդել կապերը տարածաշրջանի բոլոր երկրների հետ:

Նա նաև հիշատակել է միության արդեն գործող արտոնյալ համաձայնագրերը Վիետնամի, Սինգապուրի ու Սերբիայի հետ, ինչպես նաև Արաբական Միացյալ Էմիրությունների հետ համագործակցության պայմանագրի նախապատրաստման աշխատանքները:

«Շարունակվում են ջանքերը ԵԱՏՄ-ի ինտեգրացիոն մեխանիզմները ամրապնդելու և միության միջազգային հեղինակությունն ուժեղացնելու ուղղությամբ: Միությունը պատրաստ է համագործակցության բոլոր շահագրգիռ գործընկերների հետ», – ասել է Պուտինը:

Վերջում ռուս առաջնորդը նշել է Ասիայի, Աֆրիկայի և Լատինական Ամերիկայի երկրների հետ հարաբերությունների զարգացումը, ինչպես նաև ԲՐԻԿՍ-ի, ԱՊՀ-ի, Շանհայի համագործակցության կազմակերպության, ԱՍԵԱՆ-ի և Աֆրիկյան միության հետ կապերի խորացման կարևորությունը: