ՀՀ ԱԺ պատվիրակության անդամ Վլադիմիր Վարդանյանը ելույթ է ունեցել Եվրոպայի Խորհրդի խորհրդարանական վեհաժողովի (ԵԽԽՎ) ամառային նստաշրջանում։ Նա շեշտել է ռազմագերիների իրավունքների պաշտպանության կարևորությունը։

Վարդանյանն առաջին հերթին նշել է, որ ռազմագերիների կարգավիճակը չպետք է հավասարեցվի հանցագործներին։ «Ռազմագերիների ճամբարները չպետք է դառնան քրեակատարողական հիմնարկներ։ Սակայն, ցավոք, նրանք հաճախ ենթարկվում են կտտանքների ու խոշտանգումների», ասել է պատգամավորը։

Նա ընդգծել է, որ Ժնևյան կոնվենցիաների համաձայն՝ ռազմագերիների պահումը պետք է ծառայի միայն մեկ նպատակի՝ կանխել նրանց վերադարձը ռազմադաշտ։ Սակայն, ըստ նրա, այսօր այս սկզբունքները խախտվում են։

Վարդանյանը հիշեցրել է, որ պատերազմի ավարտից հետո բոլոր ռազմագերիները պարտադիր հայրենադարձվում են, և այս գործընթացի ձգձգումը համարվում է միջազգային հանցագործություն։

Հատուկ ուշադրություն է հատկացրել այն կատեգորիայի ռազմագերիներին, որոնք, համաձայն կոնվենցիայի, պետք է ազատ արձակվեն անմիջապես՝ անկախ ռազմական գործողություններից։ Դրանք են՝ ծանր հիվանդները, անդամալույծները և հոգեկան խանգարումներ ունեցող անձինք։

Ելույթի ավարտին Վարդանյանը կոչ է արել հարգել միջազգային իրավունքի նորմերը և հիշեցրել, որ ռազմական հանցագործությունները վաղեմության ժամկետ չունեն։