Թուրքիայի նախագահ Ռեջեփ Թայիփ Էրդողանը հայտարարել է, որ ԱՄՆ նախագահ Դոնալդ Թրամփի հետ քննարկել է F-35 կործանիչների՝ Թուրքիային փոխանցելու հարցը։ Էրդողանի խոսքով՝ Թրամփը դրական տրամադրված է այս հարցի նկատմամբ։

«Մենք Թրամփի հետ հանդիպման ժամանակ С-400-ի հարցը չենք քննարկել։ Այս թեման մեզ համար փակված է»,— նշել է Թուրքիայի նախագահը։

Էրդողանը հավելել է, որ Թուրքիան շարունակում է բանակցությունները Eurofighter կործանիչների գնման վերաբերյալ՝ Մեծ Բրիտանիայի և Գերմանիայի հետ, և այս ուղղությամբ նույնպես առկա են դրական զարգացումներ։

Թուրքիայի նախագահը նաև անդրադարձել է Ուկրաինայում շարունակվող հակամարտությանը։ Նրա խոսքով՝ պատերազմն ունեցել է տարածաշրջանային և գլոբալ հետևանքներ, սակայն կա հնարավորություն Ռուսաստանի ու Ուկրաինայի միջև հրադադարի և երկարաժամկետ խաղաղության հասնելու։ Թուրքիան, ըստ Էրդողանի, շարունակում է ջանքեր՝ հակամարտությունը արդար և կայուն լուծման հասցնելու համար։

Խոսելով Մերձավոր Արևելքի իրավիճակի մասին՝ Էրդողանը նշել է, որ Իսրայելի անվտանգությունը, ինչպես տարածաշրջանի բոլոր երկրներինը, կախված է հարևան պետությունների կայունությունից ու խաղաղ զարգացումից։

«Իսրայելի և Իրանի միջև ռազմական սրացումը տարածաշրջանը դրել է լուրջ ռիսկերի առաջ։ Թուրքիան ճգնաժամի սկզբից ջանում է նպաստել դիվանագիտական լուծման»,— ասել է նա։

Էրդողանը հավաստել է, որ Իրանի հետ տարաձայնությունների երկարաժամկետ կարգավորումը հնարավոր է միայն բանակցությունների միջոցով։ «Տարածաշրջանում կան բազմաթիվ օրինակներ, որ պատերազմն ու ավերածությունները լուծում չեն բերում»,— ավելացրել է Թուրքիայի նախագահը։