Եվրոպական Միության արտաքին գործերի նախարարները Լյուքսեմբուրգում կայանալիք հանդիպման ընթացքում կքննարկեն Իսրայել-Իրան հակամարտությունն ու կհաստատեն Ռուսաստանի դեմ պատժամիջոցների 18-րդ փաթեթը։ Նրանք կփորձեն նաև պատժամիջոցներ սահմանել մի քանի իսրայելցի նախարարների նկատմամբ՝ Գազայում հումանիտար ճգնաժամի համար, սակայն այդ որոշման հավանականությունը ցածր է՝ կոնսենսուսի բացակայության պատճառով։

Սպասվում է, որ նախարարները կհաստատեն Ռուսաստանի դեմ պատժամիջոցների նոր փաթեթը։ Ավելի վաղ Եվրահանձնաժողովի նախագահ Ուրսուլա ֆոն դեր Լյայենը հայտարարել էր, որ փաթեթը կներառի «Հյուսիսային հոսք» գազատարի օգտագործման արգելքը, ինչպես նաև ռուսական բանկերի ու նավերի արգելափակումը։ Բացի այդ, ֆոն դեր Լյայենը և ԵՄ արտաքին քաղաքականության ղեկավար Կայա Կալասը խոստացել են արտահանման սահմանափակումներ սահմանել 22 ընկերությունների համար՝ ներառյալ Ռուսաստանից, Բելառուսից և Չինաստանից, որպեսզի նվազեցնեն պատժամիջոցներից խուսափելու հնարավորությունները։

ԵՄ-ը հրաժարվել է ռուսական նավթի գնի սահմանաչափը 60 դոլարից իջեցնել մինչև 45 դոլար՝ հաշվի առնելով նավթի գների աճն ու Մերձավոր Արևելքում սրվող հակամարտությունները։ Այս միջոցառումը չի հաստատվել նաև «Յոթնյակի» գագաթնաժողովում ԱՄՆ-ի հետ համաձայնության չհասնելու պատճառով։