Ուտրեխտի համալսարանի (Նիդեռլանդներ) եւ Մադրիդի Կառլոս III համալսարանի (Իսպանիա) գիտնականների միջազգային թիմը խորացված ուսումնասիրություն է իրականացրել շիմպանզեների եւ բոնոբոների սոցիալական կապերի վերաբերյալ:

Հետազոտության արդյունքները տպագրվել են iScience ամսագրում:

Պատահական չէ, որ պարզվել է, թե այս պրիմատները, ինչպես մարդիկ, ձեւավորում են ընկերական խմբեր, որտեղ կան մտերիմ անհատներ, որոնց հետ անցկացնում են իրենց ժամանակի մեծ մասը, ինչպես նաեւ ունեն ծանոթների ավելի լայն շրջանակ:

Հետազոտողները դիտարկել են 24 խումբ շիմպանզեներ եւ բոնոբոներ՝ կենտրոնանալով մորթին խնամելու վարքագծի վրա, կարեւոր սոցիալական գործընթաց, որը նպաստում է կապերի ամրապնդմանը: Նրանք կիրառել են մաթեմատիկական մոդել, որպեսզի ուսումնասիրեն, թե ինչպես են կենդանիները բաշխում իրենց սահմանափակ «սոցիալական ռեսուրսները»:

Արդյունքները ցույց տվեցին, որ կենդանիների մեծ մասն իրենց ուշադրությունը հիմնականում կենտրոնացնում է ընկերների փոքր շրջանակի վրա, իսկ մնացած ժամանակը հատկացնում են ծանոթների ավելի լայն ցանցին: Հատկանշական է, որ շիմպանզեները տարիքի հետ ավելի խստապահանջ են դառնում իրենց հարաբերություններում, մինչդեռ բոնոբոները իրենց ողջ կյանքի ընթացքում հավասարակշռված հարաբերություններ են պահպանում: Հետազոտության հեղինակները նշում են, որ այս հայտնագործությունը վկայում է մարդկանց եւ այլ տեսակների սոցիալական փոխազդեցության ընդհանուր կանոնների մասին. «Մեր արդյունքները թույլ են տալիս ենթադրել, որ սոցիալական ջանքերի բաշխման հիմունքները կիրառվում են ոչ միայն մարդկանց, այլեւ այլ կենդանատեսակների համար»:

Գիտնականներն ընդգծել են, որ պրիմատների սոցիալական կառույցների ըմբռնումը մեզ ավելի լավ է օգնում հասկանալու մարդկային հարաբերությունների էվոլյուցիան, ինչպես նաեւ խմբերում վստահության եւ համագործակցության զարգացումը: