Կրթության, գիտության, մշակույթի և սպորտի նախարարությունում անցկացվել է կլոր սեղան-քննարկում՝ «Հայաստանում դպրոցների կառավարման համակարգի բարեփոխում. մարտահրավերներ և հաջողության պատմություններ» թեմայով, որը կազմակերպվել է «ԵՄ-ն հանուն կրթության» ծրագրի շրջանակում:

Քննարկմանը մասնակցել են ԿԳՄՍ նախարարի տեղակալ Արաքսիա Սվաջյանը, ՅՈՒՆԻՍԵՖ-ի հայաստանյան ներկայացուցչի տեղակալ Սիլվիա Մեստրոնին, հանրակրթության ոլորտի ներկայացուցիչներ, մարզային վարչությունների պետեր և այլ մասնագետներ:

Արաքսիա Սվաջյանը մանրամասն ներկայացրել է հանրակրթական դպրոցների նոր կառավարման համակարգը, առկա խնդիրները և առաջընթացը՝ կարևորելով հանդիպումը՝ թեմայի արդյունքները ամփոփելու և հետագա անելիքները նախանշելու համար:

Նա ներկայացրել է վիճակագրական տվյալներ՝ նշելով, որ շուրջ 1300 դպրոցներից 583-ն արդեն անցել են կառավարման նոր համակարգի, որի ընթացքում 234-ում նշանակվել են նոր տնօրեններ, իսկ 349-ում հաստիքը դեռ թափուր է: «Այս տարի դպրոցների տնօրենի պաշտոնի համար ներկայացված զարգացման ծրագրերը և հարցազրույցները նախորդ տարվա համեմատությամբ որակապես բարելավվել են»,- նշել է Սվաջյանը՝ ավելացնելով, որ կառավարման նոր համակարգի անցած դպրոցներում ներդրված է վարչատնտեսական համակարգողի ինստիտուտը:

ԿԳՄՍ նախարարի տեղակալը վերլուծել է, թե ինչ պահանջներ են դրվում հանրակրթական դպրոցի տնօրենների վրա՝ նշելով, որ պահանջներն առնչվում են այն գործառույթներին, որոնք տնօրենը պետք է իրականացնի՝ կրթության կարգավորումների պատշաճ ներդրման և ուսուցիչների մասնագիտական զարգացման ապահովման համար:

Անդրադառնալով ենթակառուցվածքների և ռեսուրսների արդյունավետ կիրառմանը՝ Սվաջյանը նշել է, որ «300 դպրոց» ծրագրի տնօրենների առջև դրված են հավելյալ պահանջներ՝ կառավարել դպրոցը որպես համայնքային կենտրոն՝ ապահովելով բազմապիսի ծառայություններ:

Նախարարը համառոտ ներկայացրեց նաև վարչատնտեսական համակարգողների գործունեությունը՝ նշելով, որ վարչատնտեսական գործառույթների արտապատվիրակումը սպասվում է երկու մարզերի դպրոցներում, որից հետո ծրագիրը կմտցվի բոլոր մարզերում:

Արաքսիան Սվաջյանը հայտնեց, որ որոշակի փոփոխություններ են սկսվում անվտանգության ծառայության չափանիշների թարմացման նպատակով:

Ազգային ժողովի ընդունած «Հանրակրթության մասին» օրենքի համաձայն՝ հանրակրթական դպրոցների բովանդակային կառավարումը կփոխանցվի ԿԳՄՍ նախարարությանը՝ իրականացվելու փուլային եղանակով՝ սկսելով 2026 թվականի սեպտեմբերից:

ՅՈՒՆԻՍԵՖ-ի ներկայացուցչի տեղակալ Սիլվիա Մեստրոնին հավելել է, որ տնօրենները պետք է լինեն առաջնորդներ և ռեսուրսների լավ կառավարիչներ՝ կապ հանդիսանալով ուսուցիչների, աշակերտների և ծնողների միջև:

Վերջում բանախոսները քննարկել են դպրոցի զարգացման հնգամյա ծրագրի գնահատմանն առնչվող մի շարք հարցեր՝ անդրադառնալով «Կրթության կառավարում և առաջնորդություն» ծրագրի հաջողություններին: Ներկայացվել են առաջարկներ՝ կրթության կառավարման և ուսուցչական առաջնորդության ծրագրերի բարելավման վերաբերյալ: