ՄՌԱԳ կենտրոնի փորձագետները ՀՀ ԳԱԱ Ֆիզիկական հետազոտության ինստիտուտից Ռադիոակտիվ թափոնների վնասազերծում ՓԲԸ-ի պահեստարան են տեղափոխել Co-60 տեսակի քառասուն ռադիոիզոտոպ։ Գործընթացին մասնակցել են նաև Միջուկային անվտանգության կարգավորման կոմիտեի ներկայացուցիչներ, ինչպես նաև Ազգային անվտանգության ծառայության և Ներքին գործերի նախարարության համապատասխան ստորաբաժանումների աշխատակիցներ։

Հետխորհրդային շրջանում Հայաստանում մնացել էին բարձր ակտիվության ռադիոակտիվ աղբյուրներ, որոնք այլևս կիրառության մեջ չեն։ Շուրջ տասնյակ տարիներ դրանք պահվել են Ֆիզիկական հետազոտությունների ինստիտուտի բունկերում՝ պահանջելով ապահով տեղափոխություն։ Հատկանշական է, որ Հայաստանում նման գործողություն նախկինում չի իրականացվել։

Ռադիոակտիվ և ռադիացիոն անվտանգության գիտատեխնիկական կենտրոնը մշակել էր ռադիոակտիվ աղբյուրները բունկերից հանելու և տեղափոխելու համապարփակ պլան՝ անվտանգության ամենաբարձր նորմերի պահպանմամբ։ Կենտրոնը համագործակցել է ԱՄՆ-ում գործող Oak Ridge ազգային լաբորատորիայի հետ, որի փորձագետները հրավիրվել էին Հայաստան՝ ծրագիրը քննարկելու նպատակով։

Նախապատրաստական փուլի ընթացքում մանրակրկիտ ստուգվել են տեղամասերը, գնահատվել պահանջվող նյութերն ու սարքավորումները, և մշակվել է անվտանգության պլանը։ Կարևոր էր, որ հեռացման գործընթացում ռիսկն իջեցվի՝ ապահովելով անձնակազմի և շրջակա միջավայրի լավագույն պաշտպանությունը։

Փոխադրման գլխավոր նպատակն է նվազեցնել ռադիացիոն հնարավոր ռիսկերը՝ ապահովելով տեղի բնակչության և շրջակա միջավայրի պաշտպանությունը։ Աշխատանքներն իրականացվել են ըստ միջազգային անվտանգության բարձրագույն չափանիշների, լիարժեքորեն պահպանելով տեխնիկական և բնապահպանական բոլոր պահանջները։

Այս նախաձեռնությունը կարևոր քայլ է՝ ուղղված հանրային անվտանգության հետագա ամրապնդմանը և միջուկային ոլորտում միջազգային համագործակցությունների խորացմանը։