Այս տարվա հոկտեմբերի 21-ին Մոնակոյում կկայանա Հայաստանի Անկախության տոնին նվիրված բարեգործական համերգ՝ Վրույր Փենեսյանի նախաձեռնությամբ, որը կազմակերպվում է Ֆրանսիայում Հայաստանի դեսպանատան բարձր հովանու ներքո։ Այս իրադարձությունը խոստանում է դառնալ Մոնակոյի հայկական համայնքի համար տարվա կարևորագույն մշակութային միջոցառումներից մեկը։

Համերգին հրավիրված են Մոնակոյի պետական կառույցների և հայկական համայնքի անդամներ, ինչպես նաև տարբեր համայնքների ղեկավարներ։ Համերգին կմասնակցեն հայտնի հայ երաժիշտներ, որոնք կժամանեն Անգլիայից, Իտալիայից, Ավստրիայից և Ֆրանսիայից։ Միջոցառման նպատակն է ոչ միայն նշել Հայաստանի անկախության տոնը, այլև նպաստել Հայաստանի և Մոնակոյի միջև մշակութային ու հասարակական կապերի ամրապնդմանը։

Վրույր Փենեսյանը նշում է, որ նման նախաձեռնությունները մեծ կարևորություն ունեն հատկապես փոքր, բայց ազդեցիկ հայկական համայնքի համար Մոնակոյում։

Չնայած համայնքի փոքր թվաքանակին, այն ունի մեծ ներուժ և ամուր դիրք Մոնակոյի հասարակական կյանքում։ Սույն միջոցառումը ևս մեկ առիթ է՝ վերհիշելու մեր անկախ պետության արժեքները և աջակցելու հայրենասիրական ու բարեգործական նախաձեռնություններին։

Համերգը լինելու է Մոնակոյի գլխավոր տաճարում։ Բաց են բոլոր հայերի և բարեկամների համար, ովքեր կցանկանան միասին տոնել և աջակցել Հայաստանի ու Սփյուռքի կապերի խորացմանը։

Հայաստանի հետ տնտեսական կապեր հաստատելու նպատակով համերգին հրավիրվել է Wilco ընկերությունը, որն ունի միջազգային փորձառություն ներդրումային ծառայությունների մատուցման և ակտիվների կառավարման ոլորտում։

Wilco-ն կապիտալի կառավարիչ ընկերություն է, որը օգնում է անհատներին ու գործարարներին խելամիտ կերպով կառավարել իրենց ունեցվածքը՝ առաջարկելով ներդրումային և ֆինանսական ծառայությունների ամբողջական փաթեթ։

Միջոցառման մանրամասներ շուտով կհրապարակվեն։