Աշխարհում աճում է այն մարդկանց թիվը, ովքեր գիտակցված կերպով խուսափում են լրատվական հոսքից՝ այն համարելով հուզականորեն հյուծող և տագնապալի, նշվում է The Guardian-ի կողմից։

50 երկրներում իրականացված Reuters ինստիտուտի հարցման արդյունքների համաձայն՝ մասնակիցների 40%-ը խոստովանել է, որ հաճախ կամ երբեմն խուսափում է նորություններից, ինչը զգալի աճ է՝ համեմատած 2017 թվականի 29%-ի հետ։ ԱՄՆ-ում այս ցուցանիշը հասնում է 42%-ի, իսկ Մեծ Բրիտանիայում՝ 46%-ի։

Նորություններից հրաժարվելու պատճառներ ներառում են դրանց բացասական հուզական ազդեցությունը, պատերազմների և հակամարտությունների մասին հաղորդագրությունների առատությունը, անօգնականության զգացումը և մեդիայի հանդեպ հիասթափությունը։

Շատերը ընտրում են տեղեկատվության հետ փոխգործակցության ավելի մեղմ միջոցներ՝ սահմանափակվելով շաբաթական ամփոփագրերով, հրաժարվելով տեսանյութերից կամ ընդհանրապես խուսափելով նորություններից՝ սթրեսը և տագնապը նվազեցնելու համար։

Հոգեբանները նախազգուշացնում են. տագնապալի տեղեկատվության մշտական հոսքը, հատկապես սոցիալական ցանցերի և տեսանելի ազդեցիկ պատկերների միջոցով, կարող է կործանարար ազդեցություն ունենալ հոգեկան հանգստության և տագնապի մակարդակի վրա։

Հոդվածի հեղինակները ընդգծում են, թեև նորությունների հասանելիության սահմանափակումը կարող է նպաստել հոգեկան հավասարակշռության պահպանմանը, սակայն տեղեկատվության ամբողջական անտեսումը իր ռիսկերն ունի։

Սա կարող է ուժեղացնել սոցիալական բաժանումը և նվազեցնել քաղաքական ակտիվությունը, հատկապես՝ երիտասարդների, կանանց և սոցիալ-տնտեսական առումով խոցելի բնակչության շրջանում։ Ի վերջո, հիմնական եզրակացությունն այն է, որ կարևոր է հավասարակշռություն գտնել տեղեկացված լինելու անհրաժեշտության և սեփական հուզական հարմարավետության պահպանման միջև։