ՀՀ կրթության, գիտության, մշակույթի և սպորտի նախարար Ժաննա Անդրեասյանը Իրան կատարած պաշտոնական այցի ընթացքում այցելեց «Սաադի» հիմնադրամ, որտեղ հանդիպեց հիմնադրամի նախագահ Ղոլամ Ալի Հադդադի Ադելի հետ, հայտնում են ԿԳՄՍՆ-ից։

Հանդիպմանը ներկա էին նաև նախարարի տեղակալ Արթուր Մարտիրոսյանը, ԵՊՀ ռեկտոր Հովհաննես Հովհաննիսյանը, Բրյուսովի պետական համալսարանի ռեկտոր Դավիթ Գյուրջինյանն ու Մեսրոպ Մաշտոցի անվան Մատենադարանի տնօրեն Արա Խզմալյանը: ՀՀ պատվիրակության այլ անդամներ ևս մասնակցում էին:

Ժաննա Անդրեասյանը, շնորհակալություն հայտնելով ընդունելության համար, կարևորեց Հայաստանի և Իրանի միջև բարեկամական և պատմամշակութային կապերը՝ նշելով համագործակցության խորացման կարևորությունը հատկապես կրթության և մշակույթի ոլորտներում:

Կրթության ոլորտում համագործակցությունը քննարկելիս նախարարը ընդգծեց, որ ՀՀ կառավարության 2021-2026 թվականների ծրագրում հատուկ ուշադրություն է դարձվել տարածաշրջանային լեզուների, այդ թվում՝ պարսկերենի ուսուցմանը։ Նա նշեց, որ Հայաստանում 13 դպրոցներում ներկայումս դասավանդվում է պարսկերեն։

Կողմերը քննարկեցին Հայաստանում պարսկերենի ուսուցման ընդլայնման հնարավորությունները թե՛ հանրակրթության, թե՛ բարձրագույն կրթության համակարգերում։

Միաժամանակ, Ժաննա Անդրեասյանն ասաց, որ պարսկերենի ուսուցման և հետազոտությունների իրականացման համար Մեսրոպ Մաշտոցի անվան Մատենադարանը կարող է լինել կարևոր կենտրոն, որտեղ պահվող հնագույն ձեռագրերը գիտական հետազոտություններ իրականացնելու հարուստ հնարավորություն են ընձեռում։

Ղոլամ Ալի Հադդադի Ադելը ընդգծեց երկու երկրների պատմական կապերն ու բարեկամական հարաբերությունները՝ բարձր գնահատելով ՀՀ կառավարության տարածաշրջանային լեզուների ուսուցման քաղաքականությունը։ Նա ասաց, որ այս քաղաքականությունը խթանում է մարզային մշակութային փոխըմբռնումը՝ լեզվական կրթության ապահովմամբ:

Հանդիպման ժամանակ քննարկվեցին նաև պարսկերենի առցանց դասընթացների կազմակերպման հնարավորությունները, պարսկերենի ուսուցման նպատակով կրթաթոշակային ծրագրեր ներդնելու հեռանկարները, ինչպես նաև ուսումնական նոր նյութերի ու դասագրքերի պատրաստման հետ կապված հարցեր:

Կողմերը դիտարկեցին երկկողմ հետաքրքրություն ներկայացնող մի շարք այլ հարցեր ևս։