«ՀՀ և ԱՄՆ-ի միջև Ռազմավարական գործընկերության կանոնադրության համաձայն՝ ՀՀ-ն համագործակցում է ԱՄՆ-ի հետ Արտահանման վերահսկման և սահմանային անվտանգության ծրագրի միջոցով, նպատակ ունենալով զարգացնել ՀՀ ԱԱԾ սահմանապահ զորքերի և Պետական եկամուտների կոմիտեի հնարավորությունները»,- այս մասին հայտնեց ՀՀ ԱԳՆ-ն՝ կապված ԱՄՆ սահմանային ու մաքսային թիմի այցի հետ, որը դեռ այս տարվա հունվարին հայտարարեց ԱՄՆ նախկին պետքարտուղար Բլինքենը։

Ըստ արտգործնախարարության, այս համագործակցությունը ներառում է ինչպես ՀՀ մասնագետների վերապատրաստում, այնպես էլ տեխնիկական աջակցություն։ Նախարարությունից նշվում է, որ պարբերաբար անցկացվում են փոխայցելություններ՝ ծրագրի համակարգողների և ՀՀ պաշտոնյաների միջև։

«Խաղաղության խաչմերուկ» նախագծի շրջանակներում համագործակցությունը նպատակ ունի խթանել մաքսային հսկողության արդյունավետությունը և սահմանային անվտանգության գործելակերպերի փոխանակումը ԱՄՆ և ՀՀ համապատասխան կառույցների միջև»,- նշվեց հայտարարության մեջ՝ ընդգծելով, որ այս ուղղությամբ շարունակվում են մշտական աշխատանքներ։

Այս տարվա հունվարի 1-ին Հայաստանի և Միացյալ Նահանգների արտաքին գերատեսչությունների ղեկավարները Վաշինգտոնում ստորագրել էին ռազմավարական գործընկերության կանոնադրություն։

ԱՄՆ պետքարտուղար Էնթոնի Բլինքենն այդ ժամանակ հայտնել էր, որ առաջիկա շաբաթներին ԱՄՆ-ի մաքսային և սահմանային թիմը կայցելի Հայաստան՝ զարգացնելու սահմանային անվտանգության կարողությունները։

Ներկայումս, սակայն, որևէ պաշտոնական հաղորդագրություն Հայաստանում ԱՄՆ-ի մաքսային ու սահմանային թիմի այցի մասին դեռ չի հայտնվել՝ ո՛չ ամերիկյան, ո՛չ էլ հայկական կողմից։