Վարչապետ Նիկոլ Փաշինյանը Օսակայում մասնակցել է Expo 2025 համաշխարհային ցուցահանդեսի շրջանակներում Հայաստանի ազգային օրվան նվիրված միջոցառմանը:

Վարչապետը նախ շրջել է ցուցահանդեսի տաղավարներով՝ կազմակերպիչների ուղեկցությամբ, այնուհետև պատվավոր հյուրերի հուշամատյանում կատարել գրառում: Հաջորդիվ տեղի է ունեցել ճապոնական ավանդական թեյի սեղան, որին ներկա են եղել Փաշինյանը, հայկական պատվիրակության անդամները և Ճապոնիայի արտաքին գործերի խորհրդարանական նախարարի տեղակալ Հիսաշի Մատսումոտոն:

Վարչապետը այցելել է հայկական տաղավար, որը ներկայանում է «Այսօրվա և վաղվա սյուները» խորագրով: Տաղավարն ընդգրկում է Հայաստանի նորարարական ծրագրերը, մշակութային ժառանգությունը, ներդրումային հնարավորություններն ու կրթական նախաձեռնությունները: Նշվում է, որ հայկական տաղավարի այցելությունների թիվը ցուցահանդեսի մեկնարկից ի վեր գերազանցել է մեկ միլիոնը:

Ի վերջո, կայացել է Հայաստանի ազգային օրվան նվիրված միջոցառման պաշտոնական բացումը: Տեղի են ունեցել Հայաստանի և Ճապոնիայի ազգային օրհներգերի հնչեցում: Ելույթներով հանդես են եկել վարչապետ Նիկոլ Փաշինյանը և Համաշխարհային ցուցահանդեսի գլխավոր հանձնակատարի տեղակալ Շիգետոշի Իկեյաման:

Վարչապետ Փաշինյանն իր խոսքում կարևորել է Հայաստանի ներկայի և ապագայի հեռանկարները՝ ներկայացնելով նորարարական կրթության ծրագրեր, ինչպես օրինակ՝ Թումո ստեղծարար տեխնոլոգիաների կենտրոնի Գունմայի նորաբաց մասնաճյուղը Ճապոնիայում:

Հայաստանի տաղավարը ներկայացնում է նաև «Խաղաղության խաչմերուկ»-ի տեսլականը՝ ուղղված տարածաշրջանային համագործակցության զարգացմանը:

EXPO 2025 ցուցահանդեսում հայկական տաղավարը բաց կլինի մինչև հոկտեմբերի 13-ը: