Նեպալում հինգշաբթի արգելափակվել են մի շարք սոցիալական ցանցեր, այդ թվում՝ Facebook-ը, քանի որ այս ցանցերը չեն գրանցվել իշխանությունների մոտ՝ չարաշահումների կանխարգելման ծրագրի շրջանակում, նշում է Reuters-ը։

Կառավարությունը պնդում է, որ կեղծ անձնագրերով օգտատերերը սադրիչ բովանդակություն են հրապարակում, տարածում են ատելության խոսքեր և ֆեյք լուրեր, իրականացնում կիբեռհանցագործություններ՝ խաթարելով խաղաղությունը այն երկրում, որտեղ բնակչության 90 տոկոսը ինտերնետից օգտվում է։

Ընկերություններին մինչև չորեքշաբթի ժամանակ էր տրվել գրանցվելու Կապի և տեղեկատվական տեխնոլոգիաների նախարարությունում՝ տեղական կոնտակտային անձ, բողոքների պատասխանատու և ինքնակարգավորման անձ նշանակելու համար, հակառակ դեպքում՝ դրանք ենթարկվում են փակման ռիսկի։

Հինգշաբթի կառավարության տված ծանուցումը հրահանգել է Նեպալի հեռահաղորդակցության վարչությանը (NTA) արգելափակել չգրանցված սոցիալական ցանցերը, սակայն չի նշվել, թե կոնկրետ որ հարթակներն են պատժվել։

Կապի նախարարության ներկայացուցիչը Reuters-ին հայտնել է, որ TikTok-ը, Viber-ը, WeTalk-ը, Nimbuzz-ը և Poppo Live-ը գրանցվել են, մինչդեռ մյուսները, այդ թվում՝ Facebook-ը, չեն գրանցվել։

«Մենք նրանց բավարար ժամանակ տրամադրեցինք գրանցման համար և բազմիցս խնդրեցինք կատարել այդ պահանջը»,- նշել է կապի և տեղեկատվական տեխնոլոգիաների նախարար Պրիտհվի Սուբբա Գուրունգը: «Նրանք անտեսել են մեր հարցումը, և մենք ստիպված ենք եղել դադարեցնել նրանց գործունեությունը Նեպալում»։

Ամբողջ աշխարհում, ներառյալ ԱՄՆ-ը, Եվրամիությունը, Բրազիլիան և Ավստրալիան, կառավարությունները սանձել են սոցիալական լրատվամիջոցների և խոշոր տեխնոլոգիական ընկերությունների վրա վերահսկողությունը՝ որպեսզի պայքարեն ապատեղեկատվության, տվյալների գաղտնիության խախտումների, առցանց վտանգների և ազգային անվտանգության խնդիրների դեմ։