Վաշինգտոնյան համաձայնագիրը պետք է իրատեսական քննարկման հիման վրա հանրությանը ներկայացվի: Այս մասին այսօր, օգոստոսի 17-ին, Խաղողօրհնեքից հետո իր ելույթում նշել է Մեծի Տանն Կիլիկիո կաթողիկոս Արամ Ա-ն՝ անդրադառնալով ներքաղաքական իրադրությանը:

«Վերջերս ԱՄՆ մայրաքաղաքում, ԱՄՆ նախագահի միջնորդությամբ և վկայությամբ կնքված Հայաստան-Ադրբեջան համաձայնագիրը իր յուրահատուկ բնութագրով ուշադրության է արժանի: Դրական և բացասական հետևանքների գնահատումը թողնենք քաղաքական վերլուծաբաններին: Սակայն Հայաստանը պետք է նախազգուշանա, քանի որ միակողմանի զիջումներով և երկդիմի կետերով լցված խաղաղության համաձայնագրերը կարող են լուրջ ռիսկեր ստեղծել: Հետևաբար, անհրաժեշտ է, որ այս համաձայնագիրը հանրայնորեն և առարկայական ներկայացվի ժողովրդին:

Կարևոր է, որ հանրությունը հնարավորություն ունենա արտահայտել իր տեսակետը համաձայնագրի վերաբերյալ: Հիշենք, որ Հայաստանը վտանգի տակ է հայտնվել՝ դառնալու աշխարհաքաղաքական ուժերի բախման թատերաբեմ»,- նշել է նա:

Արամ Ա-ն ընդգծել է, որ Վաշինգտոնում ժպիտների և խոստումների մթնոլորտի ներքո ստորագրված այս համաձայնագիրը հույս և ժպիտ պետք է ներշնչի զոհվածների ընտանիքների և Արցախի ժողովրդին, սակայն հիշենք, որ ժամանակավոր շահերով առաջնորդվելն անպատասխանատու է, և Հայաստանը պետք է մտահոգությամբ և հավասարակշռված քաղաքականություն վարի՝ հիմք ընդունելով սեփական շահերը:

Նա անդրադարձել է նաև գերիների հարցին և Ադրբեջանում ընթացող հակահայ քաղաքականության խնդիրներին՝ շեշտելով, որ Արցախը անցյալ չէ, և մենք պետք է հետամուտ լինենք Արցախի ժողովրդի անխախտ վերադարձի իրավունքին, ինչպես նաև եկեղեցիների պահպանման միջազգային իրավունքին: