Մալաթիա-Սեբաստիա և Սիլիկյան թաղամասերում փրկված արջերի ընտանիքը գտնվում է Վայրի կենդանիների փրկարար կենտրոնում (WRC) և հաջողությամբ անցնում է վերականգնման փուլը։ Այս մասին հայտնեցին կենտրոնից:

Շատ դեպքերում կենդանիներին պահելու պատճառները համարվում են սեփականատերերի կապը և նրանց մոտ լինելու ցանկությունը։ Սակայն մասնագիտական մոտեցումը կարևորում է, որ կենդանիների ֆիզիկական և հոգեբանական կարիքները գերակա լինեն:

Վայրի բնության և մշակութային արժեքների պահպանման հիմնադրամի (FPWC) մասնագետների թիմը ջանքեր է գործադրում՝ մեղմելու արջերի հոգեբանական սթրեսը և ստեղծելու խաղաղ և ապահով միջավայր։ Արջերի ընտանիքն արդեն կարևոր արդյունքներ է արձանագրում վերականգնողական թերապիայի միջոցով՝ աստիճանաբար հարմարվելով նոր պայմաններին։ Նրանց սննդակարգը խնամված է և հաշվարկված՝ ֆիզիկական առողջության և ուժերի վերականգնման համար անհրաժեշտ վիտամիններով հագեցած։

Այս տարվա մարտին FPWC-ի մասնագետների իրականացրած փրկարարական աշխատանքների ժամանակ 4 գորշ արջերի տեղափոխումը փրկարար կենտրոն կազմակերպվեց։ Այս արջերը տարիներ շարունակ պահվել էին Մալաթիա-Սեբաստիա և Սիլիկյան թաղամասում՝ բնակելի շենքերի, մանկապարտեզների և դպրոցների շրջապատող տարածքներում։ Նրանք գտնվեցին անբարենպաստ պայմաններում՝ զուրկ մասնագիտական խնամքից և համապատասխան սննդից։ Արջերից մեկի՝ արուի դեպքում հայտնաբերվեց չափազանց ճարպակալում (մոտ 300 կգ), ինչպես նաև կոտրված ատամներ։ Երկու էգերից մեկը ծնվել էր նույն նեղ և կեղտոտ վանդակում։ Կենդանիները պահվում էին ինքնաշեն վանդակներում, որոնք վտանգ էին ներկայացնում մոտակա բնակիչների համար։

Փրկությունից հետո Հայաստան ժամանեցին բրիտանացի մասնագիտացված ատամնաբույժները, որոնք համագործակցելով FPWC-ի և Կենդանիների փրկության միջազգային կազմակերպության (IAR) հետ, վիրահատեցին երկու արջերի ատամները:

Այս կարևոր աշխատանքը և կենդանիների շարունակական վերականգնումը պահանջում են զգալի ռեսուրսներ։ Հիմնադրամը կոչով դիմում է հանրությանը՝ աջակցել այս կարևոր առաքելությանը, քանի որ ցանկացած ֆինանսական աջակցություն կօգնի շարունակել փրկված կենդանիների բարձրորակ խնամքը։

FPWC-ն հորդորում է քաղաքացիներին զգոն լինել և անմիջապես հայտնել վայրի կենդանիների անօրինական պահման կամ վատ վերաբերմունքի դեպքերի մասին։

Վայրի բնության և մշակութային արժեքների պահպանման հիմնադրամը (FPWC) Հայաստանում անկրկնելի բնապահպանական կազմակերպություն է։ FPWC-ի և Կենդանիների փրկության միջազգային կազմակերպության համագործակցությամբ ստեղծված Վայրի կենդանիների փրկարար կենտրոնը (WRC) եզակի հաստատություն է, որը խնամում և պաշտպանում է վտանգված կենդանիներին փրկված մասնավոր անբարենպաստ պայմաններից։ Կենտրոնը բազմաթիվ արջերի մատուցել է ապաստան՝ ազատելով նրանց ռեստորաններից և բենզալցակայաններից։ Կենտրոնում կենդանիները ստանում են մասնագիտական խնամք, հատուկ սնուցման ծրագիր և անհրաժեշտ բժշկական օգնություն։

Կենդանիների փրկության միջազգային կազմակերպությունը (IAR) համաշխարհային ճանաչում ունեցող կառույց է, որը մասնագիտանում է վայրի կենդանիների փրկության և վերականգնման ոլորտում։ Հայաստանում IAR-ը FPWC-ի ռազմավարական գործընկերն է՝ համատեղ իրականացնելով Արջերի փրկության ծրագիրը։