Իսպանիայի ներքին գործերի նախարարությունը գումարել է պետական համակարգող հանձնաժողովի նիստ՝ հաշվի առնելով երկրի տարբեր շրջաններում բռնկված մեծաթիվ անտառային հրդեհները։ Այս մասին հայտնել է նախարարության մամուլի ծառայությունը։

ՆԳՆ քաղաքացիական պաշտպանության գլխավոր տնօրեն Վիրխինիա Բարկոնեսը նշել է, որ արտակարգ իրավիճակ է սպասվում՝ կապված տարբեր ինքնավար համայնքներում ծագած շատ անտառային հրդեհների հետ, որոնց դեմ պայքարը պահանջում է ռեսուրսների ամբողջական մոբիլիզացում։ Բարկոնեսը նաև հայտարարել է, որ «առաջիկա ժամերին կգումարվի անտառային հրդեհների կոորդինացման և կառավարման պետական կոմիտեի նիստ՝ իրավիճակի մանրամասն գնահատման, գործողությունների համակարգման և անհրաժեշտ որոշումների կայացման նպատակով»։

Երեկ Մադրիդի մոտակայքում բռնկվել է ամենամեծ հրդեհներից մեկը։ Այս հրդեհի պատճառով, որը արդեն տեղայնացվել է, մեկ մարդ մահացել է, իսկ մյուսը՝ վիրավորվել։ Ավելին, անվտանգության նկատառումներից ելնելով, թագավորության տարբեր շրջաններից հազարավոր մարդիկ ստիպված էին տարհանվել հրդեհների ազդեցության ներքո։

Հրդեհաշիջման աշխատանքները բարդանում են եղանակային արտառոց պայմաններով։ Օրինակ՝ Իսպանիայի պետական օդերևութաբանական գործակալությունը բարձր ջերմաստիճանի պատճառով զգուշացում է տարածել գրեթե ամբողջ երկրի համար։ Տաք եղանակի կանխատեսումների համաձայն՝ օդի ջերմաստիճանը կարող է հասնել 44 աստիճանի։