«Ես սովոր եմ տարբեր երկրների կառավարությունների ճնշմանը։ Ռուսաստանում ինձ ձերբակալել են, մուտք գործելն արգելել են յոթ երկրում։ Նպատակս 50 տարվա ընթացքում նույնն է՝ պաշտպանել մարդու իրավունքները»,- լրագրողների հետ հանդիպման ժամանակ հայտնել է աշխարհահռչակ իրավաբան Ռոբերտ Ամստերդամը, Հայաստանում գտնվելու ընթացքում։ Հնչած հարցին, արդյոք չի վախենում Հայաստանի իշխանությունների հնարավոր ճնշումից, նա նշեց.

«Հասկանալի է, որ ճնշումներ կարող են լինել, սակայն դրանք նպատակին կհասնեն միայն, եթե կա մեկը, ով կենթարկվի։ Մենք չենք նահանջում իրավունքների պաշտպանության հարցում»,- հավելել է Ամստերդամը։

ԱՄՆ-ից ժամանած իրավաբանը ցավով նշել է, որ որոշ իշխանություններ որոշ դեպքերում սխալ են կիրառում եկեղեցին քաղաքական նպատակների՝ փոխանակ այն դիտարկելու որպես պաշտամունքի օբյեկտ։

«Հասկանում եմ հարցի զգայունությունը։ Հայաստանն ունի քրիստոնյա պատանդներ Ադրբեջանում, ինչն էլ ավելի է խորացնում խնդիրը։ Սա չափազանց նուրբ ոլորտ է, և ես չեմ ցանկանում խոսել այդ մասին։ Երբ մարդիկ պատանդ են, կառավարությունները պետք է զբաղվեն դրանով։ Մենք պետք է աղոթենք նրանց ամենախաղաղ ու անվտանգ ազատման և վերադարձի համար»։

Ամստերդամը նաև ընդգծել է, որ պատրատվում է բանակցություններ սկսել Հայաստանի կառավարության հետ՝ իրավիճակի լուծման ճանապարհներ գտնելու համար։

«ԱՄՆ-ում ես արդեն հանդիպումներ եմ ունեցել հայկական շրջանակների հետ, սակայն այժմ Հայաստանի ներսում ևս նախատեսում եմ քննարկումներ անցկացնել։ Դա պահանջում է ժամանակ և ջանք՝ երկարատև խնդիրները լուծելու և քրիստոնյաներին պաշտպանելու համար»,- նշել է նա։

Նշենք, որ Ամստերդամի այցը Հայաստանի համար կարևոր քաղաքական հարցերի քննարկման նպատակ ունի․ նրա այցը կապված է մի քանի վերաբերող աղմկահարույց գործերի հետ, ներառյալ Հայ Առաքելական Եկեղեցու ներքին խնդիրները և գործարար Սամվել Կարապետյանի կալանավորման գործը։