Alaska Airlines-ի 1282 չվերթի չորս ուղեկցորդուհիներ դատական հայց են ներկայացրել Boeing ընկերության դեմ: Տուժողները պնդում են, որ իրենք մարմնական վնասվածքներ և հոգեբանական տրավմաներ են ստացել, երբ 2024 թվականի հունվարին, թռիչքի ժամանակ, Boeing 737 MAX 9 ինքնաթիռի վթարային դուռը պոկվել է, համաձայն The Seattle Times-ի:

Հայցի տվյալների մեջ ներկայացվել են վնասվածքների, բարոյական վնասների և ֆինանսական կորուստների մասին պնդումներ: Ուղեկցորդուհիները Boeing-ին մեղադրում են անապահով ինքնաթիռի պատրաստման և անփութության համար:

Տրանսպորտային անվտանգության ազգային խորհրդի (NTSB) ուսումնասիրությունների արդյունքում պարզվել է, որ դուռը տեղադրված էր չորս ամրացնող պտուտակների բացակայությամբ, ինչը դարձել է վթարային իրավիճակի պատճառ: Արդյունքում օդանավի սրահում ճնշումը կտրուկ նվազել է, թթվածնի դիմակները դուրս են եկել և խցիկի դուռը բացվել է:

Ուղեկցորդուհիների փաստաբանն ընդգծել է, որ նրանք արիաբար են գործել և այժմ փոխհատուցում են պահանջում: Մեկն ընդգծել է, որ միջադեպը “որը երբեք չպետք է տեղի ունենար”, խիստ ազդեցություն է ունեցել իր կյանքի վրա, իսկ մյուսը նշել է, որ միջադեպը խոչընդոտ է ստեղծել իր սիրելի աշխատանքին վերադառնալու համար:

Boeing-ի ներկայացուցիչները չեն ցանկացել մեկնաբանել իրավիճակը։

Դեպքը տեղի է ունեցել 2024 թվականի հունվարի 5-ին` թռիչքից կարճ ժամանակ անց, մոտ 5 կմ բարձրության վրա: Ինքնաթիռը հարկադիր վայրէջք է կատարել Պորտլենդում: Ինքնաթիռում գտնվել են 171 ուղևոր և անձնակազմի վեց անդամ: Թեև ծանր վնասվածքներ չեն գրանցվել, մի քանի ուղևորներ ստացել են թեթև մարմնական վնասվածքներ։