Սինգապուրի Նանյանգ տեխնոլոգիական համալսարանի (NTU Singapore) և Սինգապուրի Research Network հետազոտական կազմակերպության կատարած նոր ուսումնասիրությունը, որն իրականացվել է ամերիկյան Phys արհեստական բանականության հարթակի հետ համագործակցությամբ, ցույց է տվել, որ սոցիալական ցանցերի օգտագործումը վնասակար ազդեցություն է ունենում երիտասարդների ուշադրության կենտրոնացման, հուզական կայունության և վարքագծի վրա։

Հետազոտությունը, որին մասնակցել են 13-25 տարեկան 583 դեռահասներ և երիտասարդներ Սինգապուրից ու Ավստրալիայից, ինչպես նաև նրանց ծնողները, բացահայտել է մի շարք արդիական խնդիրներ։

Արդյունքները ցույց են տվել, որ սոցիալական ցանցերում երկար ժամանակ անցկացնելը կապված է ուշադրության պահպանման խնդիրների, հուզական լարվածության աճի և կախվածություն ձևավորող վարքագծի հետ։

Մասնավորապես, ուսումնասիրության մասնակիցների 68%-ը նշել է, որ ի վիճակի չէ երկար ժամանակ կենտրոնանալ, ինչի պատճառով դժվարանում է դպրոցական առաջադրանքները կատարել կամ նույնիսկ մեկ րոպեից ավելի տևողությամբ տեսանյութ դիտել։

Դեռահասներից մեկը նշել է, որ TikTok-ի օգտագործումն այնքան է կրճատել իր ուշադրության տևողությունը, որ ինքն այլևս անգամ մեկ րոպե տևողությամբ վիդեո չի կարողանում դիտել առանց շեղվելու։

«Մեր ուղեղը, սովորելով անընդհատ նորություններ փնտրել և ակնթարթային դոպամինային հաճույք ստանալ, աստիճանաբար կորցնում է երկար ժամանակ կենտրոնանալու կամ խորը մտածելու ունակությունը։ Սա նման է կախվածության մեխանիզմին, որտեղ անհրաժեշտ է ավելի ու ավելի շատ խթան՝ գոհունակություն զգալու համար», ― բացատրել է ուսումնասիրության գլխավոր հեղինակ, պրոֆեսոր Ջեմմա Քալվերտը։