Սուրբ Երկրի ամենաբարձրաստիճան եկեղեցական առաջնորդները, այդ թվում հայոց պատրիարք Նուրհան արքիեպիսկոպոս Մանուկյանը, երկուշաբթի այցելել են Արևմտյան ափի պաղեստինյան քրիստոնեական Թայբեհ քաղաք։ Վերջին շաբաթներին քաղաքը ենթարկվել է արմատական նորաբնակների հարձակումների, իսկ եկեղեցականները մեղադրել են իսրայելական իշխանություններին՝ հալածանքներին լռելյայն աջակցելու մեջ։

Հայ Առաքելական եկեղեցու պատրիարք Նուրհան արքիեպիսկոպոս Մանուկյանը, Երուսաղեմի պատրիարք Թեոֆիլոս III-ը և Երուսաղեմի լատին պատրիարք Պիերբատիստա Պիցցաբալլան (Pierbattista Pizzaballa) համատեղ հայտարարությամբ դատապարտել են նորաբնակների գործողությունները։ Նրանք դրանք որակել են որպես տարածաշրջանի քրիստոնեական ժառանգությանը հասցվող սպառնալիք և պահանջել հետաքննել ոստիկանության գործողությունների բացակայությունը։

Առաջնորդները այցելել են Թայբեհ՝ աջակցություն ցույց տալու տեղի քրիստոնյա համայնքին։ Այնտեղ անցկացվել են մամուլի ասուլիս և աղոթքի արարողություն՝ նվիրված վերջերս տեղի ունեցած հրկիզման դեպքին։

Հորդանանի թագավոր Աբդուլլահ II-ը նույնպես արձագանքել է իրադարձություններին։ Նա քաղաքում տեղի ունեցած հրկիզումը անվանել է «մեռյալների սրբության, քրիստոնեական սրբավայրերի անձեռնամխելիության և Սուրբ Երկրում քրիստոնեական ներկայության խախտում»։

Թայբեհի բնակիչներն ու եկեղեցականները անցյալ շաբաթ հայտարարել էին, որ ուժեղանում են նորաբնակների հարձակումները։ Վերջին լուրջ միջադեպը եղել է Սուրբ Գևորգ եկեղեցու մոտ ծայրահեղականների վարած հրկիզումը։

Պատրիարքները կոչ են արել Իսրայելի իշխանություններին պատասխանատվության կանչել հարձակումների մեղավորներին և անցկացնել փաստացի հետաքննություն տեղի ոստիկանության անգործության վերաբերյալ։ «Ինչու՞ չեն արձագանքել բնակիչների կանչերին, և ինչու՞ գործողությունները մնում են անպատիժ»,– ընդգծել են նրանք։ Տեղական եկեղեցականները հաստատել են, որ իրազեկել են ոստիկանությանը, բայց օգնություն չեն ստացել։

Առանձնակի ուշադրություն է հրավիրել այն փաստը, որ իսրայելական լրատվամիջոցները միտումնավոր բաց են թողել Հայոց պատրիարքի մասնակցությունը համատեղ հայտարարությանը՝ հիշատակելով միայն Թեոֆիլոս III-ի և Պիցցաբալլայի անունները։