ՆԳՆ Ոստիկանությունը տարածել է հաղորդագրություն, որտեղ նշվում է, որ բնակչության շրջանում բացատրական աշխատանքներ ծավալելու շնորհիվ քաղաքացիները կանոնավոր հիմունքներով ապօրինի ձևով պահված զենքեր և զինամթերք են հանձնում իրենց տեղամասային ոստիկանություններին։

«Համայնքային ոստիկանության Անիի բաժնի աշխատակիցների և Շիրակի մարզի պարեկային ծառայության համատեղ ջանքերի շնորհիվ հուլիսի 9-ին ոստիկանություն զանգահարած քաղաքացին հայտնել է, որ իր հայրը մասնակցել է 44-օրյա պատերազմին և Քարաբերդ գյուղի մոտ գտնվող լճի տարածքում զենք-զինամթերք է թողել։ Օպերատիվ խումբը, ժամանելով նշված վայր, հայտնաբերել է ձեռքի նռնակներ իրենց պայթուցիչներով, պայթուցիկ նյութի հատկություններ ունեցող առարկա, ինքնաձիգի պահունակ և 251 հատ տարբեր տրամաչափի փամփուշտ։

Նույն օրը, Համայնքային ոստիկանության Բազումի բաժնի կողմից կազմակերպված բացատրական աշխատանքների շնորհիվ ստացվել է ահազանգ՝ Վանաձորի Բուլղարական ավանում զինամթերքի մասին։ Տեղում Բազումի բաժնի աշխատակիցները գտել են պարկ, որում ներառված էին «ՏՕԶ-8» մոդելի ակոսափող հրացան, թմբուկավոր ատրճանակ, 3 նռնակ պայթուցիչներով, ֆիթիլի 1 կապոց, ինքնաձիգի լիցքավորված պահեստատուփ 1 փամփուշտով և 112 տարբեր տրամաչափերով փամփուշտներ։

Հուլիսի 9-ին Արտաշատի Համայնքային ոստիկանության մշտական բացատրական աշխատանքներն իրենց դրական արդյունքն են տվել․ քաղաքացին, ով կապ է հաստատել ոստիկանության հետ, նշել է, որ ինքը մասնակցել է 44-օրյա պատերազմին և Արտաշատ-Երևան ավտոճանապարհի Դալար գյուղի հարակից դաշտում զինամթերք է թողել։ Արտաշատի բաժնի աշխատակիցները տեղում հայտնաբերել են պոլիէթիլենային տոպրակ, որի մեջ եղել են 12 մմ տրամաչափի երկփողանի հրացան, 16 մմ տրամաչափի մեկփողանի հրացան, մեկ «Ֆ1» տեսակի նռնակ, պայթուցիչով «ՌԳԴ» տեսակի նռնակ, ինքնաձիգի 79 փամփուշտ և ինքնաձիգի փամփուշտի մեկ գնդակ։

ՆԳՆ Ոստիկանությունը կրկին կոչ է անում քաղաքացիներին կամավոր հանձնել ապօրինի պահված զենքերն ու զինամթերքը՝ քրեական հետապնդումից խուսափելու համար»,–հաղորդվում է հաղորդագրության մեջ։