**Հայաստան-ԵՄ գործընկերության կոմիտեի հանդիպումը կայացել է Բրյուսելում**

Հուլիսի 8-ին Բրյուսելում տեղի է ունեցել Հայաստան-Եվրոպական միություն գործընկերության կոմիտեի վեցերորդ հանդիպումը՝ Համապարփակ և ընդլայնված գործընկերության համաձայնագրի (ՀԸԳՀ) հիման վրա։ Նիստին մասնակցել է ՀՀ ներքին գործերի նախարարի տեղակալ Արմեն Ղազարյանը։

Հանդիպումը համանախագահել են ՀՀ արտաքին գործերի նախարարի տեղակալ Վահան Կոստանյանը և Եվրոպական արտաքին գործողությունների ծառայության Արևելյան Եվրոպայի ու Ռուսաստանի հարցերով կառավարող տնօրենի տեղակալ Օդրոն Պերկաուսկիենեն։

Քննարկումների ընթացքում կողմերը նշել են Հայաստանի և ԵՄ միջև գործընկերության զգալի առաջընթացը։ Հատուկ ուշադրություն է դարձվել ՀՀ ԱԳ նախարար Արարատ Միրզոյանի և ԵՄ բարձր ներկայացուցիչ Կայա Կալասի հայտարարություններին, ինչպես նաև Եվրոպական հանձնաժողովի կողմից մուտքի արտոնագրերի ազատականացման ծրագրի հաստատմանը։

Արմեն Ղազարյանը ներկայացրել է ոստիկանության համակարգի բարեփոխումները, մարդու իրավունքների պաշտպանության, կոռուպցիայի դեմ պայքարի և ուժի կիրառման նոր ստանդարտների ներդրման գործընթացները։

Քննարկվել են նաև վիզաների ազատականացման, սահմանային ու միգրացիոն հոսքերի կառավարման, ինչպես նաև Հայաստանում աղետների ռիսկի կառավարման մեխանիզմները։

ԵՄ-ն բարձր է գնահատել Հայաստանի ձեռքբերումները ժողովրդավարության, օրենքի գերակայության և մարդու իրավունքների ոլորտներում։ Ընդգծվել է բարեփոխումների շարունակականությունը և խտրականության բոլոր ձևերի վերացմանն ուղղված լրացուցիչ միջոցառումների անհրաժեշտությունը։

Կողմերը նշել են նաև քաղաքացիական հասարակության լիարժեք ներգրավվածության կարևորությունը հանրային կառավարման և որոշումների կայացման գործընթացներում։

Արտաքին քաղաքականության և անվտանգության ոլորտում կողմերը ողջունել են Հայաստանի ու ԵՄ միջև վերջերս ստորագրված համաձայնագիրը, որը սահմանում է ԵՄ ճգնաժամային կառավարման առաքելություններին Հայաստանի մասնակցության շրջանակը։ Նշվել է նաև Հայաստան-ԵՄ անվտանգության և պաշտպանության առաջին խորհրդակցությունների անցկացումը։