**Պայթյուն և հրդեհ՝ Երևան-Սևան-Իջևան ավտոճանապարհին**

Հուլիսի 8-ին, ժամը 22:40-ին, Երևան-Սևան-Իջևան ավտոճանապարհի 60-րդ կիլոմետրի հատվածում տեղի է ունեցել արտակարգ դեպք։ Գեղարքունիքի մարզի 30-ամյա բնակիչ Խաչիկ Ա.-ի «Mercedes» մակնիշի ավտոմեքենայում պայթյուն է տեղի ունեցել, ինչի հետևանքով բռնկվել է հրդեհ։

Առաջին օգնություն են ցուցաբերել ՀՀ ՆԳՆ ոստիկանության Պարեկային ծառայության Գեղարքունիքի մարզի գումարտակի 1-ին վաշտի պարեկներ Միշա Հակոբյանը և Ջանիկ Գևորգյանը։ Նրանք վարորդին և ուղևորին տեղում բուժօգնություն են ցուցաբերել, ապա ծառայողական մեքենայով տեղափոխել «Սևան» բժշկական կենտրոն։

Վթարի վայր են ժամանել նաև ՀՀ ՆԳՆ փրկարար ծառայության Սևանի հրշեջ-փրկարարական ջոկատի աշխատակիցները։ Նրանք մարել են մեքենայում բռնկված հրդեհը, որը, նախնական տվյալներով, առաջացել է գազի արտահոսքի հետևանքով։ Անվտանգության նպատակով փակվել է գազաբալոնի փականը։

Դեպքի վայրում ծառայողական ապահովումն իրականացրել են Պարեկային ծառայության պարեկներ Հուսիկ Հակոբյանը և Սևակ Գրիգորյանը՝ գումարտակի հրամանատար Ալբերտ Մարտիրոսյանի ու ծառայության ավագ տեսուչ Բակուր Սարիբեկյանի ղեկավարությամբ։

Տեղեկատվությունը փոխանցվել է ՀՀ Քննչական կոմիտեի Գեղարքունիքի մարզային վարչությանը։ Սևանի քննչական բաժնի պատասխանատուների ժամանելուց հետո նախաձեռնվել է քրեական գործ՝ պարզելու հանգամանքները։ Այս պահին ճշտվում է վարորդի ուղեկցող անձի ինքնությունը։

**Ծանուցում**
Ենթադրյալ հանցագործության մեջ կասկածվողը կամ մեղադրվողը անմեղ է, մինչև նրա մեղավորությունը չի ապացուցվել դատարանի՝ օրինական ուժի մեջ մտած վճռով։