Հայ-իրանական սահմանին հայկական բեռների ուշացումները տեխնիկական բնույթ ունեն։ Հայաստանում Իրանի դեսպան Մեհդի Սոբհանին այս մասին հայտարարել է հունիսի 27-ին։

Դեսպանի խոսքով՝ նմանատիպ խնդիրներ երբեմն առաջանում են երկու երկրների սահմանին։ «Դիտվում են դեպքեր, երբ սահմանին կուտակվում է մինչև 300 բեռնատար, ինչը հանգեցնում է խցանումների։ Մենք հաստատուն կապի մեջ ենք տեղական իշխանությունների հետ՝ գործընթացը հեշտացնելու համար։ Ցանկացած խոչընդոտ արագ վերացվում է։ Պետք է ընդգծել, որ խնդիրները պարբերաբար լուծվում են և չպետք է դրանք չափազանցնել», — ասել է Սոբհանին։

Նա նշել է, որ Արաքս գետի վրա գործող կամրջի օրական տարողունակությունը 120 բեռնատար է, սակայն այժմ այնտեղով օրական միջինում անցնում է 600 մեքենա։ Դեսպանը հավելել է, որ գոյություն ունեն երկրորդ կամուրջ կառուցելու ծրագրեր։

Զրույցում Սոբհանին անդրադարձել է նաև Սյունիքում իրանական ընկերությունների կողմից իրականացվող ճանապարհաշինարարական աշխատանքներին։ «Նախագիծը հաջողությամբ է ընթանում՝ գերազանցելով աշխատանքային գրաֆիկը 3%-ով։ Եթե պահպանվեն ներկա տեմպերը, շինարարությունն ավարտվելու է նախատեսված ժամկետից շուտ։ Ուշադրության կենտրոնում է նաև Ագարակ-Երևան ուղղությամբ բեռնափոխադրումների բարելավումը։ Այս ուղղությամբ մենք զգալի ուշացում ունենք», — ավելացրել է դեսպանը։