Հայաստանի երկրորդ նախագահ Ռոբերտ Քոչարյանը նոյեմբերի 9-ին TV5-ի հետ ունեցած հարցազրույցում նշեց, որ 2021թ. ընտրությունների արդյունքները մեծ շոկ էին իր համար, երբ պարտություն ու զոհեր բերած մարդը վերընտրվեց։

Նա վստահ էր, որ դա կարող է տանել ավելի ծանր հետևանքների, ինչը, ըստ նրա, տեղի ունեցավ՝ Արցախի ամբողջական կորստով և Հայաստանի որոշակի մասի օկուպացիայով։

Քոչարյանն ընդգծեց՝ ենթադրում է, որ հասարակությունն այժմ վերագնահատում է ներկա իրավիճակը, և շատերը այլ կերպ են մտածում։ Նրա խոսքով, իշխանության եկած ուժը տալիս էր հաճելի խոստումներ, սակայն ձախողվեց։

«Այսօր նրանց կենտրոնացումը միայն խաղաղության օրակարգի վրա է՝ առանց այլ ասելիքի։ Նրանք փորձում են ներկայացնել իրենց որպես միայն խաղաղություն բերող ուժ, սակայն դա արեցին այն ժամանակ, երբ երկիրը տառապեց ամենասարսափելի պատերազմով»,– ասաց նա։

Արցախի խնդրի վերաբերյալ Քոչարյանը նշեց, որ պետք է ռեալիստորեն մոտենալ՝ աշխատելով միջազգային կառույցներում վերադարձի իրավունքը հաստատելու ուղղությամբ։

Նա ընդգծեց, որ առանց ՀՀ-ում փոփոխությունների որևէ հույս հաջողության՝ որևէ ատյանում չպետք է սպասենք։ Հայաստանն այժմ պետք է փոխի իր ընթացքը՝ հաջողություն հասնելու նպատակով։

Քոչարյանը նաև հստակեցրեց, որ արցախցիների վերադարձի հարցը չի առնչվում Ադրբեջանի հայերի վերադարձին։ «Արցախի հարցը այլ թեմա է, քանի որ Խորհրդային տարիներին անգամ ունեցել է իր կարգավիճակը, և նման համեմատությունը չի կարելի կոռեկտ համարել»,– ասաց նա։