Հորդանանում, Լիբիայում և Մալթայում Հնդկաստանի նախկին դեսպան Անիլ Թրիգունայաթն ընդգծել է, որ Հարավային Կովկասում հաղորդակցությունների ապաշրջափակումը օգտակար կլինի նաև Հնդկաստանին։

Անիլ Թրիգունայաթն նշեց, որ Հարավային Կովկասում հաղորդակցային ուղիների ապաշրջափակման հեռանկարները մեծ արժեք ունեն Հայաստանի տարածքում ստեղծվելիք TRIPP երթուղու և «Խաղաղության խաչմերուկ» նախագծի համատեքստում։ Սա քննարկվեց «Օրբելի ֆորում. կառուցելով խաղաղություն և բազմակողմանի համագործակցություն» միջազգային համաժողովի ընթացքում։

«Անխափան հաղորդակցության միջոցներն ու կապուղիները չափազանց կարևոր են։ Հարավկովկասյան տարածաշրջանում կապուղիների բացումը կարող է մեծ հավելյալ շահ բերել նաև Հնդկաստանին։ Ես շարունակում եմ գնահատել Հայաստանի գաղափարը՝ այդ ուղիներն անվանել «Խաղաղության խաչմերուկ»։ Սա շատ կարևոր է։ Եվս մեկ կարևոր նախագիծ Հարավային Կովկասում Հյուսիս-հարավ միջազգային տրանսպորտային միջանցքն է, որի անդամ է նաև Հնդկաստանը։ Ես ներկա էի դրա հիմնադրման ժամանակ։ Առևտրային ու տրանսպորտային միջանցքները նոր չեն։ Մենք շատ արժեք ենք դնում դրանց վրա։ Եթե խաղաղ կապուղիներ ստեղծվեն բոլոր առնչվող երկրների ներդնումներով, ապա գործընթացը շատ հեշտ կլինի։ Մարդիկ մշտապես աշխատում են խաղաղության համար։ Մենք պետք է միասին գործենք այդ ուղղությամբ»,- նշել է Թրիգունայաթը։

Խոսելով Վաշինգտոնում Հայաստանի ու Ադրբեջանի միջև ստորագրված համաձայնագրերից՝ դեսպանը նշել է, որ իրականացումը արագ չի լինի, քանի որ ժամանակ է պետք՝ վերացնելու միմյանց նկատմամբ կասկածները։

«Վաշինգտոնի համաձայնությունների հաջող իրականացումը կապված է երկու կողմերի անկեղծությունից։ Գործընթացը ժամանակ է պահանջում, քանի որ միմյանց նկատմամբ կասկածները վերացնելը կամացընթաց գործընթաց է։ Այս իրավիճակում լրատվամիջոցների դերն էլ կարևոր է: կառավարությունները պետք է ջանք գործադրեն՝ պայքարելու ապատեղեկատվության դեմ։ Արդյունքում, հաղորդակցությունը և վստահության ամրապնդումը կարևոր են երկու երկրների համար»,- ասաց Անիլ Թրիգունայաթը։

Օգոստոսի 8-ին Վաշինգտոնում Հայաստանի և Ադրբեջանի միջև ստորագրվել է համատեղ հռչակագիր՝ ԱՄՆ նախագահ Դոնալդ Թրամփի միջնորդությամբ, ինչից հետո նախագահը վկայորեն ստորագրել է հռչակագրի տակ։ Նույն օրը Հայաստանն ու Ադրբեջանը նախաստորագրել են խաղաղության համաձայնագիրը։