Հայաստանի կրթության, գիտության, մշակույթի և սպորտի նախարարությունը հայտնում է, որ 2025-2026 ուսումնական տարվա համար նախատեսվում է օտարերկրյա քաղաքացիների, այդ թվում՝ սփյուռքահայերի, փաստաթղթերի հայտագրման գործընթացի մեկնարկը: Այն կիրականացվի fs.emis.am էլեկտրոնային համակարգի միջոցով:

Գործընթացի ժամկետները հետևյալն են՝

Սփյուռքահայ դիմորդները կարող են դիմել անվճար առկա ուսուցմամբ բակալավրի ծրագրի (հայագիտական, մանկավարժական և արվեստի մասնագիտություններ) ընդունելության համար 2025 թվականի հունիսի 23-ից մինչև օգոստոսի 22-ը:

Վճարովի առկա ուսուցմամբ բակալավրի և անընդհատ ու ինտեգրացված ծրագրերի, ինչպես նաև նախապատրաստական դասընթացների դիմորդների ընդունելությունը նախատեսված է 2025 թվականի հունիսի 23-ից մինչև սեպտեմբերի 30-ը:

Վճարովի մագիստրատուրայի ծրագրերի (ներառյալ նախապատրաստական դասընթացներ) համար դիմումներ կհանձնվեն 2025 թվականի հունիսի 23-ից մինչև հոկտեմբերի 10-ը:

Հեռակա ուսուցմամբ բակալավրի ու մագիստրատուրայի ծրագրերի վճարովի ընդունելությունը կարող է իրականացվել 2025 թվականի հունիսի 23-ից մինչև հոկտեմբերի 16-ը:

Վճարովի ասպիրանտուրայի ծրագրի դիմորդները կարող են ընդունվել 2025 թվականի հունիսի 23-ից մինչև նոյեմբերի 14-ը: