Մարդու իրավունքների պաշտպան Անահիտ Մանասյանը հունիսի 20-ին մասնակցել է «Մարդկային եղբայրության դերը սոցիալական արդարության ամրապնդման գործում» թեմայով քննարկմանը՝ կազմակերպված միջազգային համաժողովի շրջանակում։

Համաժողովին բացման խոսքով հանդես եկան ՀՀ նախագահ Վահագն Խաչատուրյանը, Աշխատանքի և սոցիալական հարցերի նախարար Նարեկ Մկրտչյանը, և Աշխատանքի միջազգային կազմակերպության ներկայացուցիչ Բեատե Անդրեեսը։ Հիմնական դասախոսություն կատարեց Արաբական Միացյալ Էմիրությունների ներկայացուցիչ դոկտոր Խալիդ Ալ-Ղայթը:

Քննարկման ընթացքում Անահիտ Մանասյանը ընդգծել է մարդու իրավունքների պաշտպանության համատեքստում համերաշխության և ներառականության կարևորությունը։

Նա նշել է, որ սոցիալական արդարությունը մարդու իրավունքների համակարգի կարևոր բաղադրիչն է՝ ասելով․

«Մարդու իրավունքների համակարգի առանցքը սոցիալական արդարությունն է՝ խթանելով համերաշխությունը և ներառականությունը»։

Անահիտ Մանասյանը կարևորել է այն խնդիրների ուշադրության կենտրոնում պահելը, որոնք տարիներ շարունակ անտեսված են եղել․

«Օրինակ՝ բազմաթիվ երեխաներ չեն կարողանում պարտադիր կրթություն ստանալ՝ գյուղատնտեսական աշխատանքներում զբաղված լինելու պատճառով, ինչն անթույլատրելի է երեխայի իրավունքների տեսանկյունից»։

Նա նաև անդրադարձել է աղջիկների վաղ ամուսնություններին՝ նշելով․

«Վաղ ամուսնությունները աղջիկներին զրկում են կրթությունից և զարգացման հնարավորություններից։ Անհրաժեշտ է լուրջ քայլեր ձեռնարկել այս ուղղությամբ»։

Քննարկմանը հանդես եկան նաև այլ հեղինակավոր մասնագետներ, ներառյալ Վրաստանի և Սլովակիայի ներկայացուցիչներ ու Հնդկաստանի ինքնազբաղված կանանց ասոցիացիայի տնօրեն Ռիմա Նանավատին։