Հայաստանի կրթության, գիտության, մշակույթի և սպորտի նախարար Ժաննա Անդրեասյանը հանդիպել է «Գիտուժ» նախաձեռնության անդամների հետ։ Հանդիպման ընթացքում քննարկվել են «Բարձրագույն կրթության և գիտության մասին» օրենքի նոր նախագծի վերաբերյալ առաջարկություններն ու կարևոր դիտողությունները։

Միջոցառմանը մասնակցել է նաև Բարձրագույն կրթության և գիտության կոմիտեի նախագահ Սարգիս Հայոցյանը։

ԿԳՄՍ նախարարն արտահայտել է շնորհակալություն «Գիտուժ» նախաձեռնությանը ներկայացված առաջարկների համար՝ ընդգծելով, որ համատեղ քննարկումներն ու տարբեր կողմերի ներգրավվածությունը կօգնեն ճշգրիտեցնել Ազգային ժողովի կողմից առաջին ընթերցմամբ ընդունված օրենքի ձևակերպումները։ Նա նշել է, որ մինչև երկրորդ ընթերցումը անհրաժեշտ է իրականացնել բոլոր անհրաժեշտ ճշգրտումները։

Ժաննա Անդրեասյանը ընդգծել է բարեփոխումների արդյունավետությունը՝ նշելով, որ բոլոր դիտողությունները կքննարկվեն։ Միևնույն ժամանակ, նա շեշտել է, որ առաջարկվող փոփոխությունները պետք է լինեն պարզ, հստակ և ուղղված կոնկրետ խնդիրների լուծմանը։

«Գիտուժ» նախաձեռնության ներկայացուցիչները մանրամասն ներկայացրել են իրենց առաջարկությունները՝ կապված «Բարձրագույն կրթության և գիտության մասին» օրենքի նախագծի հետ։

Քննարկվել են գիտական կազմակերպությունների դասակարգումը, գիտական գործունեության կազմակերպման և հետազոտությունների իրականացման հետ կապված հարցերը։ Բարձրագույն կրթության համակարգում հետազոտական բաղադրիչի ամրապնդման առումով քննարկվել է նաև ակադեմիական ինստիտուտների ու բուհերի միավորման հարցը։

ԿԳՄՍ նախարարը շեշտել է, որ բարձրագույն կրթությունն ու գիտությունը չեն կարող զարգանալ մեկուսացված միմյանցից։ Նրա խոսքով՝ գիտությունը պետք է ընդգրկի ոչ միայն բուհերը, այլև գիտահետազոտական ինստիտուտներն ու կենտրոնները, որոնք աշխատում են կոնկրետ խնդիրների լուծման ուղղությամբ։ Նշվել է, որ կարևոր է ունենալ գիտության զարգացման միասնական ռազմավարություն և հայեցակարգ, որն ընդգրկի բոլոր տեսակի հետազոտությունները՝ հիմնարար, կիրառական և փորձարարական։

Ժաննա Անդրեասյանը նշել է, որ փորձարարական մշակումների ոլորտում դեռևս կան որոշ չհստակեցված հարցեր։ Նրա կարծիքով, անհրաժեշտ է հստակեցնել տարբեր գերատեսչությունների լիազորությունները։ Միևնույն ժամանակ, ընդգծվել է, որ կարևոր դեր ունի գիտական քաղաքականությունն ու զարգացման ուղղությունները համակարգող մարմնի արդյունավետ գործունեությունը։

«Գիտությունը պետք է դիտարկել որպես ամբողջական գործընթաց, որտեղ հետազոտությունը, փորձարկումներն ու կիրառական մշակումները փոխկապակցված են։ Գիտական գործունեությունը չի կարող ծավալվել մեկուսացված կամ տարանջատված։ Գիտելիքի ստեղծումն ու կիրառումը պետք է լինեն անխզելի շղթա, որտեղ հետազոտությունները, փորձերը և նորարարությունները լրացնում են միմյանց»,— ասել է Ժաննա Անդրեասյանը։

Քննարկվել է նաև գիտության ոլորտում քաղաքականության բարելավման հարցը։ Հատուկ ուշադրություն է հատկացվել կառավարման մեխանիզմների զարգացմանը, մասնավոր հատվածի հետ համագործակցությամբ հետազոտական ծրագրերի իրականացմանը, ինչպես նաև գիտնականների և հետազոտողների մասնագիտական աճի աջակցությանը։

Այս համատեքստում քննարկվել է նաև գիտական և ճարտարագիտական գործունեության սահմանումների ու տերմինաբանության մշակման անհրաժեշտությունը։ Նպատակն է ստեղծել խթանող միջավայր, որը կնպաստի երկրի տնտեսական ու գիտական զարգացմանը: Շեշտվել է նաև, որ կարևոր է կատարելագործել գիտական կազմակերպությունների գործունեության գնահատման չափանիշները՝ ուշադրությունը կենտրոնացնելով ոչ թե հրատարակված աշխատանքների քանակի, այլ դրանց գործնական ազդեցության ու որակի վրա։ Նշվել է, որ օրենսդրությունը պետք է ճկուն լինի, որպեսզի գիտական հաստատությունները կարողանան օգտագործել զարգացման նոր հնարավորություններ։

Հանդիպման ընթացքում քննարկվել են նաև օրենքի նախագծին և գիտամշակութային ոլորտի զարգացմանն առնչվող այլ կարևոր հարցեր։